تؤبرني…

شوووو؟ اشوف عيد… عيد شو قلت… عيد شو حكيت… هلأ بدك تروح؟ هلأ؟! منين جبتلي هلأ؟ ما الك غير اسبوع منقلع وغايب عنا.!! بعدين تراك ما رحت لبيروت وعشت فيها عشر سنين… حتى ترجع تقولي هلأ!! كله اسبوع… وفي عمان كمان… ع طول انعوج لسانك؟!! طول عمرك بتقول بالثم المليان… الحين.بتطلع من ثمك مثل الدبشة. بس يا محسنها. في كم يوم بس… انقلبت… الحين ل هلأ؟! وكمان مع… طعجة.! وبجوز كمان شوي تقولي… تؤبرني…!! ذكرتني يا شين في ابن قرابتنا اللي سافر يدرس في بلاد برا… ولما رجع… نزل مع ابوه عالوطاه… بتعرفها الوطاه ولا نسيتها كمان؟ اه الوطاه يعني البستان… البيارة… وهناك في الوطاه سال ابوه… بتدري عن شو سأل أبوه؟ سأله عن شجرة التين… بقول بابااا إيش هاي؟ ابوه سمع ابنه بقول (بابا)… انجن… قاله بااابااا؟!! أنا بااباا يا ملعون الوالدين.؟!! بعد هالعمر وهالشيبة بتقولي بابا؟! ناوي تقل قيمتي وتضيع هيبتي… في هاليومين اللي تغربتهن.؟ بعدين يا غبيران بطلت تعرف هاااي؟!!… بطلت تعرف شجرة التين…؟! هذي يابا الحماطة… وبصراحة منا قادر اكمل شو قاله ابوه كمان… حتى يذكره في شجرة التين… عيب… ليش بسرعة بنشلح ثوبنا؟ الاصيل يا خوي ما بغير ثوبه… وما بغير جلده… وما بغير لسانه… وبتمسك بلهجته زي ما بتمسك في دينه وشرفه وفي عاداته وفي قيمه واخلاقه… وبعدين مالها لهجتنا؟! صح دفشه… لكن يا ويلي… محسنها…