حنتش بنتش. واللي يلحق ينتش…

قوموا ناموا… حبايبي… الله يرضى عليكوا… قوموا ناموا… يللا… يااا عيااال بقول قوموا ناموا… يا أوادم قوموا ناموا… يا قرود يا سعادين قوموا نامووووا. وبعدييين؟!! (بصوت أعلى) صارلي ساعة بقول قوموا ناموا…!! أجيب الحفاية؟ يللا… منامكوا جاهز من زمان… خلصوني… ترى طلعت معي ووصلت لهانا (بتأشر على خشمها)…
- يمه… بكره عطلة لويش بدكي تنيمنا من الحين؟ خلينا كمان شوي…
- ما في ولا شوي ولا غيره… تحركوا عالنوم الساعة صارت تسعة… ترى اذا ما نمتوا… بتجيكوا الغوله ام سبع روس… ما دخلني…
- يمه لا تكذبي علينا… شو غولة… ما غولة.؟ يمه اسمعي… اليوم الاستاذ شرحلنا عن الكذب وقال الكذب حرام… حتى على الحيوانات… قال الاستاذ ان البخاري الله يرحمه وهو بجمع الأحاديث سافر لليمن لاخر الدنيا لانه سمع في واحد حافظ حديث للرسول عليه الصلاة والسلام… ولما وصل البخاري عنده… وبعد كل هالتعب… شافه بأشر للحصان بثوبه يعني انه فيه اكل… حتى يمسك الحصان… يعني بكذب عالحصان… بعد هيك البخاري ما رضي يكلمه ولا يسمع منه الحديث… لأنه كذب على الحصان…
- أشوف انت انطم واسكت… وبعدين كويس اللي تكلمت عن البخاري وعن الصحابة… كانوا الاولاد اللي قدكوا في العمر وازغر منكوا ايام الصحابة يوقفوا على اصابع رجليهم عشان يطولوا حالهم وحتى يقبلوهم للجهاد وللحرب… مو مثلكوا طول النهار بتلعبولي في الشوارع… يلله يلله… عالنوم… وهوس… ولا كلمة…
- طيب خلص بنام… بس لازم تحكيلنا قصة…
- ماشي… اسمعوا… كان ياما كان في قديم الزمان… كان في اولاد بلعبوا عند القبور في الليل لعبة اسمها… لعبة الخوف والمراجل… لعبة عشان العفاريت يطلعوا من القبور… لازم اولاد اللعبة يدخلوا جوا المقبرة في العتمة… وينادوا بصوت عالي ويقولوا…(حنتش بنتش واللي يلحق ينتش)… ويشردوا… يهربوا…
- خلص يمه خلص… بطلنا ما بدنا لا قصة ولا اشي… الغولة ام سبع روس ارحم من هالقصة… تصبحي على خير…