مدونة عبد الله كريشانبحث

تعزيل…

عبد الله حامد كريشان
رسم تعبيري لخاطرة «تعزيل…»

ولا واحد يدخل… خليكوا عالباب من بره… البيت قايم قاعد… وخلونا نعرف نشتغل… السجاد طلعناه بره نادوا صحابكوا وكتوه… نظفوه… كل ثلاثة اربعة يمسكوا سجاده ويطرقوها طرق عالشارع خلي كل الغبرة تطلع منها… وبدنا تجيبولنا عصاي طويلة… يا اما سعفة نخل… عشان نعسف الحيطان والسقف… ولما تخلصوا السجاد تعالوا دزوا معنا الخزانة والمكتبات وفكوا التخوت ما بنعرف نفكها ونركبها… بدنا نغير الترتيب… من العيد اللي راح ما غيرنا… وبعد هيك روحوا عند صحابكو لا ترجعوا قبل العصر… علينا شغل كثير… بدنا نليف الحيطان ونجلى كل ادوات المطبخ ونمسح الخزاين… وبدنا نفضي خزاين الملابس ونرتبها وبدنا نلمع كل الخشب والاثاث اه صحيح بدنا (براسو) عشان نلمع النحاس والمناظر… دورولنا براسوا من السوق… هاظا اللي العسكر بلمعوا فيه التاج والقايش… واليوم ترى غدا واكل ما في… كل واحد يفتحلوا علبة طن أو يسويله سندويشة… ودبروا حالكوا… محنا فاضين نطبخ وننفخ… وكمان لما تروحوا عالسوق جيبوا علبة كماليكا… واللي بعرف فيكوا يدهن بدنا يدهن الكراسي… عتمن وبدهن دهان… الكماليكا بتخلي الكراسي الخشب… يلمعن لمع… ولما ترجعوا اذا شفتونا مخلصين الشغل بتشلحوا كنادركوا وحفاياتكوا بره عند الباب وبتمسحوا رجليكوا في الممسحة المبلولة وبتمشوا على روس اصابعكوا… بدي الشميمتوا يظل يلمع…

يمه شو كل هاظا؟! شو رايك نجيب بلاط ونبلط البيت كمان؟! والله لو الامانة بدها تفتش عالبيت ما سويتوا هيك؟! منين اخترعتن التعزيل…؟! قبل العيد تعزيل… وقبل رمضان تعزيل… ولما يدخل الصيف تعزيل… ولما يدخل الشتا تعزيل… ولما تفتح المدارس تعزيل واذا في خطبة تعزيل واذا في نفاس تعزيل…!!! وحياتكن كلها… تعزيل في تعزيل… الله يكون في عونكن… وعونا… شو هالقرادي هذي؟!!!

لكن بيني وبينكوا. يا جماعة… والله يا عمي النظافة حلوة… والله يعطيهن العافية…

قراءة المنشور الأصلي على فيسبوك