مدونة عبد الله كريشانبحث

بشعرها؟!

عبد الله حامد كريشان
رسم تعبيري لخاطرة «بشعرها؟!»

أنا عرفت يا عمك شو سبب زيارتك… والدك كلمني بالتلفون… وحكالي… وكمان هو سالني عن البنت… يا عمك المستشار مؤتمن… وانت هدفك شريف… بدك تكمل نص دينك… وبدك تبني اسرة… وتتزوج… وانا ياعمك بتمنالك كل خير… انت مثل اولادي… وان شاء الله ما بغشك… يا عمك أنا بعرف هالعيلة حق المعرفة… هذول الناس جيرانا من سنين طويلة… واولادهم بعرفهم وهم اطفال… وكل سكان الشارع كمان بعرفوهم… عيلة محترمة جدا… وناس مؤدبين واخلاقهم عالية وسمعتهم زي المسك… ومعاملتهم مع الجميع من ارقى ما يكون… أنا عارف انت ايش اللي مشوشك وشاغل بالك ومحيرك… وليش ما خليت واحد وما سالته عنها… لانك شايفها بتطلع بشعرها… ومش محجبة… صحيح يا عمك الحجاب مطلوب وربنا امر فيه… والحجاب هو زينة المرأة… وكلنا بنتمنى ان كل بناتنا يكونوا محجبات… لكن يا عمك في بنات كثير ما توفقن للحجاب لكنهن محترمات جدا… ومش كل بنت مش لابسه الحجاب بعني انها لا سمح الله مش كويسة… لا… ابدا… وهذي البنت اللي بتسالني عنها احسن مثال… صح بتطلع بشعرها… لكنها في منتهى الادب… أنا تقريبا بشوفها كل يوم بحكم الجيرة… صدقني ما شفت مثل ادبها ومثل اخلاقها… عينها ما بترفعها عن الارض… والبنت مربية كويس وع قد حالها… ما في واحد بقدر يوجهلها كلمة… أو يمس شعره منها… البنت يا عمك قمة في الاخلاق وقمة في الادب… لا تحكم على المظهر وانا بنصحك تقدم واخطبها وانت مطمن عالآخر… ما بتلاقي مثلها… اللبس يا عمك تعويد مش أكثر… وانت وشطارتك بعدين… وهذول الناس عاشوا فترة مع الاجانب… يمكن تاثروا فيهم… لكنهم ناس محترمين جدا… توكل على الله… والف الف مبارك…

قراءة المنشور الأصلي على فيسبوك