مدونة عبد الله كريشانبحث

منقع دم

عبد الله حامد كريشان
رسم تعبيري لخاطرة «منقع دم»

عشائر امريكا قاطبة وعشائر بريطانيا وفرنسا وبعد فشل كل محاولات منقع الدم… قاضي العشائر الشهير… في التوصل لحل بينهم وبين عشائر روسيا… وايران… الذين قطعوا الوجوه والكفل… والحفل… واطلقوا مواشيهم وأغنامهم… وهوشهم وبوشهم… في مراعي سوريا… وخبوا كلب الحراسة تبعهم… عندهم في مخبا سري… الكلب اللي سبب المشكلة كلها… من سنين… وضيع معظم الحلال…

يا اخوان… الناس المطلعين على شؤون عشائر امريكا وبريطانيا وفرنسا… والمطلعين على شؤون عشائر روسيا وايران بقولوا ان الموضوع كله لعبة.في لعبة… ومسرحية… وجماعة ترمب وربعه… وجماعة بوتن وكلابه… قابضين كلهم تحت الغطا والفراش. والشغله كلها مرتبة بينهم… وكل اللي بتسمعوه كذب في كذب… حتى منقع الدم تبعهم اللي حاطينه بينهم… قابض… تحت الغطا والفراش… كل السالفة بدهم اغنام الطرفين تسرح وتمرح وترعى… في مراعي سوريا وين ما بدها… ويلحقوا تالي الربيع العربي… قبل ما يخلص… بقولوا بعد البلاد فيها خير…

ويا علي ويا علي… وين لقوا هلي؟

شرقوا للمويلح… وعشبا ملي!

المهم… حتى الراعي ملعون الوالدين تبعهم… الخاين اللي باع الغنمات… وباع الحلال… وذبح الجديان والصخال… وكمان كلب الحراسة والسلق اللي معه… بقولوا كل العشاير من الجهتين متفقين يرجعوه نفسه مع سلقه… وبدهم اياه يظل يرعى وين ما بده… وسلامتكم…

ويا قاضي ويا قاضينا…

قراءة المنشور الأصلي على فيسبوك