جيل بايز

يابا ليش دايما معصب؟ دايما بتبهدل فينا؟ هذي مش عيشه؟! هههه… وما بعجبك شغلنا! وايش ما سوينا بتقول لا مو هيك!! اذا نجحنا بتقول النجاح ما بكفي… اذا جبنا تسعين… بتقول شو هاي التسعين!! أنا كنت اجيب مية… اذا جبنا ميه… بتقول ان شا الله مفكرين ميتكوا زي ميتنا!!… بعدين اذا قعدنا معكوا في الديوان وحبينا نشارك في الكلام بتجحرنا في عيونك اللي بطلع منها شرار. حتى ما نتكلم… ولما نسالك يابا ليش ما خليتنا نتكلم… بتقول بعدكوا زغار شو بفهمكوا في كلام الرجال… ولما نقولك يابا طيب وانت قدنا كنت متجوز… بتقول اشوف انطموا ان شاء الله بتحسبوا حالكوا زينا!! بدك الصحيح يابا هاظا اسمه قمع… هههههه… عارف ردك يابا… "قوم قمعه تقمعك وتقمع اشكالك… هههههه«… بس جد يابا ليش انتو هيك؟!… بصراحة زودتوها… مع أنا عارفين انكوا بتحبونا وبتخافوا علينا وبدكوا نصير احسن منكوا… بس انتو مش شايفين اسلوبكوا كيف… أنا حاس انك رح تصفقني كف خماسي وثلاثي الابعاد… بس يابا خليني انفس شوي تراني مضغوووووط… هههههه… عارف عارف بدك تقول ضغطة تضغطك… عادي ولا يهمك… بس السؤال… معقول يابا انكو بتعرفوا أنا بنحبكو زي ما بقولوا العشاق… بنحبكوا مووووووت!!! معقول!!! والله بنحبكوا… بس المشكلة انكوا يابا وكل جيلكوا دايما بتقولوا عنا كلام مش كويس» سلبي" وكمان مش صحبح… ههههه… بتقولوا عنا… جيل بايز… جيل تعبان… جيل آخر زمان… جيل شاق الارض وطالع منها… احنا يابا جيل بايز؟ اااااااااخ… هههههه… يابا ذبحتني… شو يابا؟ كل هاظا كف؟! كنت اسمع بنجوم الظهر… الحين شفتها…
سمعت يابا آخر نكته؟
واحد بقول خرب عندنا خزان المي في الليل وطلعت مع ابوي ع السطح نصلحه… ابوي بالمفتاح بحاول يفك الماسورة وانا ماسكله الضو… ظل يحاول بحاول ما عرف يفكها اخر شي أنا اخذت المفتاح واعطيته الضو… فكيتها من اول محاوله… سفقني كف طير عيوني من راسي قالي هيك يا حيوان بمسكوا الضو مو مثلك… هههههه