صح النوم

ريحة الطابون مع نسمات الفجر وصوت ابراهيم زيد الكيلاني في اذاعة عمان وحركة في البيت كله قبل طلوع الشمس… ومن كل مكان بتسمع هالعبارات… يا الله… يا صباح يا فتاح… يا رزاق يا عليم… يا الله ترزقكوا… يا الله تفتحها في وجوهكوا… يا الله توفقكوا… فرخ معان بزقزق… وريحة الريحان… وعلى السفرة خبز قمح مقحمش متشكل بحجار الرظاف وابريق شاي وابريق حليب… حليب الغنمات والبيضات من عند الجاجات للمقلاية مع سمنة بلدية ريحتها بتهفهف… جبنة وزيت وزعتر ونعايم الله… الكتب والدفاتر مربوطة بسير… وقلم الرصاص في اخره سفرة طلق الماني فاضي عشان يطول القلم ويكفي… والزغير عبى جيبته قضامه مالحة بتعريفة والتعريفة الثانية للهريسة في الفرصة… في الحصص ادب واحترام… والنسخ خلى خطك تمام… انت بتداوم في مدرستك تتربى وتتعلم… وابوك قصد باب الكريم لكن مبسوط ومبتسم ومطمن… والام بلش برنامجها تكنيس وشطف وترتيب… وطبخ ريحته بتلاقيك من عند باب الحوش… يماااا شو طبختي…؟ ومع الغدا برنامج ما يطلبه المستمعون… والسهرة معروفة… اليوم الثلاثا حضروا حالكوا… رايحين عند الجيران نتفرج على حسني وغوار اليوم برنامج صح النوم… وصح النوم…
ويسعد صباحكوا يا قوم