عام 2055

اااااااخ يا اولاد…!!! يعني لازم تفتحوا جروحي… وتخلوني احكي… وين ايامنا احنا… ووين ايامكوا؟! الله برحم ايامنا… ايام خير وبركة… ايام كان الناس يشتروا البندورة بالكيلوا… والخبز بالربطة… ايام كانت الجاجة كاملة تنحط عالطبخة… ايام المواطن ما كان يدفع غير ثلاث ارباع دخله ضرايب… ايام البنات ما كانت تطلع من البيت غير وهي لابسة بنطلون…
ايام التواصل المزبوط وايام المحبة… بتصدقوا احنا قبل ثلاثين سنة… كان الواحد فينا يشوف اولاده مره في الاسبوع… ومن غير يمين كان الواحد يزور خواته وارحامه في كل عيد… اه في كل عيد… بتصدقوا كمان أنا كنا نبعث لبعص تقريبا كل يوم… مسجات… مرات صباح الخير… ومرات صورة ورد… وكنا نبعث لبعض ادعية وفيديوهات… ومرات نبعث نكت اه والله… اشي نبعث عالواتس اب واشي عالماسينجر… ونحط لبعض كمان لايكات عالفيس بوك… ومرات نعلق لبعض… أنا عارف.ما رح تصدقوا… كانت العيلة هذيك الايام كل يوم جمعة يقعدوا يفطروا مع بعض وعلى سفرة وحدة… طبعا مش مصدقين… كنا حتى في الايام الثانية يعني غير ايام الجمع… كنا ومع ان كل واحد فينا عايش في غرفته لحاله بس كنا نتواصل مع بعض عالفيس بوك… وعلى الانستجرام… اه والله. كل واحد ماسك تلفونه طول النهار وببعث للثاني… مش مثلكوا… ااااااخ بس… ولكوا وجعتوا قلبي… راحت هذيك الايام… وين ايام الانترنت والجيجات!! ووين ايام الايمو!!… كنا نتجمع مرات عالماسينجر أو على الايمو ونسهر مع بعض ونشوف بعض بالعشر دقايق… وبالربع ساعة… وين ايامنا ايام المحبة والبساطة والناس الطيبة… بجوز كمان ما تصدقوني اذا قلت كنا اذا ناس بعيد من السامعبن بصير عندهم حالة وفاة… كنا نكتبلهم عالفيس بوك عظم الله اجركم… اه والله. وفي ناس كان يكتب سطر وسطرين ويمكن يكتب دعاء للميت… اكيد مش مصدقين… طبعا لان الناس كانت متماسكة وقلوبها ع بعض مش مثلكوا… شو بدي اسولف… وايش بدي احكي!! بتصدقوا وبتآمنوا بالله انه في ايامنا كان الجار اللي ساكن في العمارة يسلم على جاره اللي معه في نفس العماره اذا تلاقوا على الدرج أو في المصعد ويقوله صباح الخير أو مسا الخير بدون جاره ما يستغرب… أو يزعل منه… اكيد ما رح تصدقوا… لكن شو الفايدة من الكلام… لازم تغنوا اغنية…
قول للزمان ارجع يا زمان…
الله يعينكوا على زمانكوا بس…