مدونة عبد الله كريشانبحث

لو تلاقي الف دينار قديش بتعطيني منهم؟

عبد الله حامد كريشان
رسم تعبيري لخاطرة «لو تلاقي الف دينار قديش بتعطيني منهم؟»

لانه زمان ما كان فيه تلفزيونات ولا تلفونات… كانت الناس تسهر مع بعض… بيت العم… مع بيت الخال… عند بيت الجد… يعني ارحام… وقرايب… وجيران… اطول سهرة ما كانت تتجاوز الساعة عشرة… كان فيه طقوس للضيافة… اول شي بتقدم البزر… المخلوطة… النقرشه… احسن نقرشه كان يبيعها عبدالحميد ابو بسام الله يرحمه… مع النقرشة أو التسالي لازم ابريق الشاي مع النعنع… شاي عود… ابو الولد… وبنباع بالوقية… وبنحط عالابريق بالكمشة. لازم يخدر الشاي… وبعدين ينحط عليه النعنع… اذا الضيوف برانيين غرب… يمكن ينعملهم قالب كيك على البابور… وبجوز رز بحليب…

في سهرات العيلة والقرايب كان في فقرات بتتكرر كثير… مثل فقرة الحزازير…(اشي قد الكف ما بلتف… واشي طويل طويل ما بسع مد شعير… أرنبا ترنبا تحت الشجر تقلبن… عمتك اخت ابوك خال ابنها شو بقربلك… وخرابة مليانة عظام وحج احمد برقص قدام… ومثل هالحزازير…) كمان من الفقرات اللي بتتكرر… سؤال للزغار ولطلاب المدارس…(انت لما تكبر شو بدك تصير؟) طبعا هانا ببدا العرط اشكال والوان… اللي طيار واللي بدو دكتور… واللي رئيس… ومرات بعضهم بدو يصير ملك… لكن في نسبة كبيرة كانوا بدهم سايق تريلا… مهنة من البيئة… كمان في سؤال بتكرر كثير وهو لفشة الغل وللتنفيس (لو معك الف دينار… أو لو تلاقي الف دينار شو بتسوي فيهم؟… أو قديش بتعطيني منهم؟) طبعا الف دينار في هظاك الوقت كان اكبر رقم… لكن اذا السؤال موجه لابن مثلا وكثرت عليه الطلبات وحتى يرضي الجميع لازم يرفع الرقم الالف ما بكفي… يمكن يوصل خمسين الف… حتى يوزع على الجميع…

سهرات زمان كانت حلوة لانه ما كان فيه… تكنولوجيا…

قراءة المنشور الأصلي على فيسبوك