يلله على بيت زوجك

هو يا بنتي كل ما صار بينك وبين زوجك كلمة أو مشكلة بسيطة بدك تحملي شنتتك وتجرجري اولادك وتيجي؟! ما بصير هالحكي… وانا كمان ما بقبله بالمرة… صح هذا بيت ابوك ومفتوحلك على طول وتيجي ان شاء الله كل يوم… انتو عارفين ان احب الساعات لقلبي لما تكونوا كلكم متجمعين عندي… بس ما بدي اي وحدة فيكو تجيني زعلانه… كل المشاكل الزوجية بتنحل اسهل ما يكون بين الزوجين وفي بيتهم… وكل ما طلعت مشاكلهم برا البيت بتتضخم وبتتعقد أكثر وأكثر… ربنا جعل بين الزوجين سكينة ورحمة لازم نستفيد منها وندور عليها مش ندور عالمشاكل ووجع الراس والقلب… والحياة الزوجية المفروض انها اشي مقدس والها حرمتها… وما بجوز تخريبها هيك بهالسهولة ولاتفه الاسباب… اللهم ما يكون سبب كبير كبير وتعجزوا عن حله… اما المشاكل العادية ما في بيت في الدنيا بخلى منها وما في بيت بخلى من الزعل… الاصل في الحياة الزوجية السكينة والرحمة والمودة والحب والتفاهم… مش الهوش والنكد والتحدي والزعل… واذا لا سمح الله صار الزعل وصار… ففي الف طريقة بين الزوجة وزوجها للحل… بشرط يكون بين بعضهم… وبالعقل وبالتفاهم وبالكلمة الطيبة وبالحكمة وبالتنازل شوي من هون وشوي من هون… واكيد بتمشي الامور… اسرار البيوت ما بجوز تطلع لبرا حتى لو لاقرب الناس… والرجل كمان لازم يعرف كيف يحل مشاكله في بيته بسترة ومساترة ولازم يعرف كيف يكسب زوجته ويكسب قلبها واحترامها… طبعا بالعقل وبالحكمة وبطولت البال… يلله يلله يا بنتي… الله يرضى عليك روحي على بيتك وبيت زوجك… وجهزينا عشا بدنا نيجي أنا وامك نتعشى ونسهر عندكم…