هجيج

- لحظة… لحظة… لحظاااااا… وقف.يا رجل وقف هالبكم وقف… الحمد لله انك سمعتني… مرحبا… خير ان شاء الله… ع وين… بشوفك مكفت اثاثك واغراضك ومحمل شناتيك! وين رايح؟
- شو بدك فيي وقفتني؟ خليني اتسهل
- لا شو تتسهل!! وين راحل؟
- بدي اهج… ما ظللي قعدة في هالبلد… يلله خاطرك…
- لا استنى… شو… من عقلك بتحكي؟
- والله من عقلي ونص…
- له له!!! شو هالكلام يابن الحلال… قول وغير
- ابدا… رايح ومثل ما بقولوا… إلى غير رجعة…
- كيف بدك تروح يا رجل… ارضك… وبيتك… واهلك… وناسك… معقول يطاوعك قلبك تترك كل هظول؟!
- اساسا ما ظل عندي قلب…
- اف!! ليش كل هذا؟
- بالله عليك تخليني ساكت وفك عني خليني انقلع
- لا والله ما بسكت… ولا بخليك تروح… كيف تروح واحنا بنتفرج… مو عيب علينا.!!. بس بالله عليك تقولي شو السبب اللي بدو يخليك تهج من بلدك…
- يعني معقول انت مش شايف بعينك شو اللي قاعد بصير!! ا الناس يا رجل بدها توكل بعض… لا صدق… لا محبة… لا احترام… ما في واحد قلبه عالثاني… يا رجل اخلاق ما ظل… حتى الحكومة اللي انوجدت مشان ترعى الناس وتهتم فبهم وتحل مشاكلهم… وتحسن اوضاعهم قاعدة بتمص في دمهم مص ولو يطلع بيدها يمكن تحرقهم حرق… والشعب كمان من الويل والقهر والفقر والنقر ما في واحد طايق الثاني… اقولك… أنا نفسي مش طايق حالي…
- يا رجل استهدي بالله… انت بتهول الامور… ومزودها كثير… اصبر بس وبكرا ربك بفرجها…
- ونعم بالله… يا خوي لا تفكر انها شغلة فلوس أو مصاري لااا… الحمد لله مستورة… والارزاق بيد الله وربك كريم… المشكلة خيوه فينا احنا… في الناس في التعامل… لا في مخافة الله… ولا في انسانية لا من فوق ولا من تحت… ما في غير الكذب والفساد والنفاق والدجل والحقد والحسد والغل والشماتة… والمحسوبية… ولعانة الثوى…
اتركني يا رجل… اتركني مشان الله خليني اهج… قبل ما انجلط أو تنبط مرارتي…