مدونة عبد الله كريشانبحث

كان مبسوط

عبد الله حامد كريشان
رسم تعبيري لخاطرة «كان مبسوط»

كان مبسوط لما كان يلعب هو والاولاد في الشارع لحد الليل وما يخافوا من شي… كان مبسوط لما كان مصروفه قرش أو حتى تعريفه… ولما كان البيت من طين وارضيته تراب تتكنس في مقشة شيح… ولما بعدين صارت شميمتو… تنشطف بالمي مرتين. الصبح والعصر… وينفرش فيها الفراش لقعدة الشاي أو البطيخ في الصيف… لما كان الصبح يشم ريحة الطابون… ويجيب البيضات من عند الجاج… لما كانت الحارة كلها قرايب وحبايب… ويتفقدوا بعض… لما كانت خرابة البيت مصنع انتاج… فيها هوش وفيها بوش… فيها قصيلة وزرع… وفيها بير مي مثل الثلج… لما كان يشوف عمامه وخواله واصحابهم قاعدين العصر بشربوا شاي عالمصطبة وبنكتوا وبضحكوا… ويمكن بلعبوا سيجة أو طاب… وكان مبسوط لما كان الراديو يتشغل من الفجر على عبدالباسط أو الحصري… والعصر على ام كلثوم… كان مبسوط لما يروح من المدرسة ويرمي شنتته من عند الباب وينادي يماااا شو غدانا؟ كان مبسوط وهو بتخبى احترام لاستاذه اللي جاي من بعيد حتى ما يشوفه بلعب… ولما كان يوقف على حيله كل ما دخل ابوه البيت… ولما كان ابوه يوخذه معه وين ما يروح… ولما كان يبوس ايد ابوه وامه وجدته وجده وعمامه وعماته وخالاته… كل ما شافهم… كان مبسوط وهو شايف نسوان الحارة العصر متحشمات لابسات الترواك والجرجيت وبزوروا بعض ولما كان يروح هو وابوه واخوانه في الليل يحضروا المصارعة عند الجيران… كان مبسوط لما كان جده يسولف عن سيرة بني هلال وعن الزير سالم… وعن حرب المدين… كان مبسوط لما يشوف كل البلد فرحانه لعريس أو حزينه كلها على ميت…

كان مبسوط لانه ما كان فيه سيارة ولا تلفون ولا تلفزيون… وكان مبسوط لانه ما كان فيه حقد ولا حسد… وكانت الناس تحب بعض… وتخاف على بعض…

قراءة المنشور الأصلي على فيسبوك