كل شي تمام التمام…

البال مرتااااااح… والوضع كله فاخر من الآخر… الاسعار… رخيييييصة سعر البلاش… مستوى التعليم للاولاد وللاحفاد… احسن من هيك عبث… مدارس حكومية… غير شكل… اهتمام منقطع النظير… واخلاص وتفاني… والمناهج… مستويات رفيعة جدا جدا… الخدمات الصحية والعلاج… وانسانية الطب والاطبا… اووووه… لا تسولف… اشي فوق العادة وفوق التصور… حتى الاطباء يا حرام اغلب الوقت ما برضوا يوخذوا مصاري من المريض… والمستشفيات مفتوحة بدك تقول شبه سبيل لكل الناس… مش بس الحكومية حتى المستشفيات الخاصة… ما فيه استغلال ابدا أبدا البطالة ما إلها اثر في بلادنا بنوب بنوب… والعاطلين عن العمل وينهم؟!! جيبولي بس واحد خليني اشوفه… اختفوا بالمره وبطل الهم أثر… حتى اننا صرنا نشتاقلهم… الشوارع مزفتة ومثل القزاز… لا جورة… لا حجار… لا مطبات… حتى انك بتنعس وانت بتسوق من الهدوء… وعجلات سيارتك بتزهق منها من كثر ما طولت… ازمات سير… ما في بالمرة… اقولك… حتى زامور في شوارعنا ما بتسمع… هوس هوس… والكل ماشي بأدب واحترام… التجار واصحاب المحلات… الفرحة بدها تنط من وجوههم نط… مش ملحقين بيع… فقرا ومساكين وشحادين ومظلومين… هذي الاصناف من البشر مالهم وجود في بلادنا بتاتا… اما الفساد… المحسوبية… الرشوة… الظلم… كل هذي مصطلحات قديمة جدا… انقرضت وتلاشت عندنا… ومن زماااااان ما سمعنا فيها… النظافة ما بتتوصف يعني بيجي ع بالك تلحس اشي من عالارض من كثر النظافة… الحكومة… يا سلاااااااام عالحكومة!!!!! بتموووت في الشعب موت… يعني كيف كان قيس يحب ليلى؟! زي هيك واكثر… والشعب كمان من كثر ما بحب الحكومة بتحسهم بدهم بهجموا على الوزارات ويطلعوا الوزرا والمسؤولين كلهم ويحملوهم عالاعناق حمل ويلفوا فيهم في الشوارع من زود المحبة… الناس يا عمي كلها شبعانه… ومترفهه. ومبسوطة… ومكيفة… وكل شي تمام التمام… واللي بتسألوا عن احواله بستهجن وبقولك من عقلك بتسأل هيك سؤال؟!! الاحوال مثل الذهب العصملي… والحياة وردية… وردية… وردية…
(وانتو يا قراء لا تصدقوا ولا كلمة من اللي
)