ذكريات شتوية - اعادة

قالت الأم: يمه ناوليني نكاشة البابور بتلاقيها في درج النملية التحتاني
… نكشت البابور… حطت كمشتين قمح في المقلاية… في الايد الثانية مسكت الملعقة… وهي بتحرك في القمحات على نار البابور… قالت يمه لبين ما اخلص القلية شوفي الصوبة يمكن بدها ديزل… خلي اخوكي يعبيها هي الجركن عند باب الخرابة… شغلوا الصوبة قبل ابوكو ما يروح… جهزوله فراشه عند كوع الصوبة الجاعد فوق الجنبية والمخدتين… والمكتي… ابوكو بحب يسخن الخبزات على كوع الصوبة…
الولد وهو بصب الديزل في بطيخة الصوبة قال… يمه ما بدنا قلية… زهقنا منها بدنا يا شعرية وسكر… يا بتسويلنا فطيرة سكر… قالت الام وهي بتطفي البابور وبتفرغ القلية في الصحن وبترش فوق القمحات شوية بطم… ماشي انتو بس تشهونو… انت شعرية وسكر واخوك بدو فطيرة سكر واختكو الكبيرة بدها بكره ششبرك… دخل الحج… سلم… وقال وهو بشلح الفروه… تراني سمعت كل شي… أنا بدي بكره رقاقة… يا إما رشوف… خلينا نتدفى في هالبردات… قح قحتين وقال
ليش هيك التلفزيون مغبش؟ ركبنا شبكة دولية وماتور وبوستر وبعده مش زابط…
قوم يا ولد بشوفك دملت راسك… لا تسويلي حالك نايم… قوم اطلع على السطح حركلي الشبكة الحين بتيجي المصارعة الحرة…
بلاها المصلرعة الحرة الليلة يا حج… قالت الام… الحين العيل على السطح بزنطه البرد… الدنيا سمييطة… بتقص العظم…!!…
بدي أشغلك الراديو… الليلة في برنامج مجلس الشعرا…
طلعت الام عالكرسي… ومدت ايدها للرف وفتحت الراديو وحركت المفتاح… قال الحج ايوه خلص خلص يا حجة خليه على هالاغنية… وارتفع صوت سميرة توفيق
بالله تصبوا هالقهوة وزيدوها هيل
واسقوها للنشامى ع ظهور الخيل