مدونة عبد الله كريشانبحث

بير زمزم عليه… حارسا ما ينام

عبد الله حامد كريشان
رسم تعبيري لخاطرة «بير زمزم عليه… حارسا ما ينام»

أغاني امهاتنا زمان في البيت كانت متنوعة

يوم الغسيل مثلا… طبعا مستحيل يكون يوم اثنين لانه مو مليح الغسيل يوم الاثنين… ليش؟ ما ناس بعرف… صحن الغسيل عالارض وكوم الغسيل ع جنب وبتبدا من الفجر

يا بيي محمد ع الساحة رجاجيلي…

وبتجر عليها أكثر من ساعة ونص لغاية ما تخلص الغسيلات…

واذا خلصت الأغنية وما خلصن الغسيلات بتحول على

هلولي يا هلولي وانا راكب ذلولي

شرط تكون متجلية معها

اذا كانت الأجواء دينية يعني مثل هالايام ايام حج بتكون الاغنية

بير زمزم عليه حارسا ما ينام…

وطبعا الأغنية طويلة بجوز النشميات يكملنها في التعليق

لما بدها تنيم الزغير بتحط المخده على رجليها وبتمدده عليها وبتهز

اووووه… نام يا وليدي نام

لاذبحلك جوز الحمام

اذا طول ما نام بجوز تغني

يا ربنا يا ربنا تبعث مطر لزرعنا

هم الكبار اذنبوا واحنا الصغار شو ذنبنا

واذا ما رضي ينام بتبطل تغني بالمرة وبتعصب وبتقول

غراب البين بزعق في السما

…

لكن الإبداع المزبوط ما بطلع غير في الحمام

لما بدها تحمم قرد من قرودها هانا تعالوا تفرجوا

بتحضر المفرمة طاولة صغيرة بتشوفوها بالصورة وصابونة النعامة وليفة طويلة مشقوقة من النص يابسة لو تسمط فيها زلمه بغيب والمي في السطل صارلها أكثر من ساعة بتغلي عالبابور… وببلش الهجوم الغنائي

طهروا يا شلبي وناوله عمو…

تليها كل الاغاني الحماسية اللي بتزيد السرعة والمروة

مثل

على الجسرين ناصب رشاشه

وبتظل تفرك في المغبر بالليفه اللي مثل ورق القزاز وتجلخ فيه جلخ بكل عزمها عليم الله طبقة الجلد الفوقانية ما بظل منها شي ويمكن تلحق الطبقة اللي تحتها… المفروض يا ناس ان غسيل الوجه في الليفة والصابون ببلش من الراس من فوق وبنزل بعدين تحت عالوجه هذول لااا… الليفة والصابون بتبدأ من الحنك وبتطلع للخشم للعيون يعني عكسي… الخشم بصير يمصي والعيون بتهر هر دموع… وكل شوي بتقطع الأغنية وبتقولك نف… اشوف نف…

ََما ظنيت ان في واحد من جيلنا عنده ذكريات حلوه في الحمام

واحد من أصحابنا كان يقول لأمه يمه مشان الله شوي شوي.انت بتحسبيني حلة نحاس عليها سخام؟!!

قراءة المنشور الأصلي على فيسبوك