مدونة عبد الله كريشانبحث

إما مش فاهمين أو مش مهتمين

عبد الله حامد كريشان
رسم تعبيري لخاطرة «إما مش فاهمين أو مش مهتمين»

يا اخي معقول اللي أنا وانت شايفينه وبنفكر فيه المسؤولين الكبار لسا ما شافوه ولا بفكروا فيه؟!! مستحيل انهم مش فاهمين… أنا شايف الزغير والكبير والأمي والمتعلم في هالوطن… فاهمين وعارفين كل شي… شعبنا واعي… اقولك حتى أولادك الزغار في البيت فاهمين القصة كلها… مش بس فاهمين… ممكن كمان يعطوك حلول… أنا اللي مجنني برود هالمسؤولين، كأن الوضع ما بعنيهم.، مش مكترثين ولا مهتمين ولا متحركين زي ما بقولوا في الأمثال عرس عند جيرانا… أو بطيخ يكسر بعضه… اليوم واحد من الاصدقاء، لا هو سياسي ولا إداري، مواطن عادي… قال يا اخي ليش الحكومة ما توخذ من الناس مثلا على كل طالب بدل ما كانوا يوخذوا عليه رسوم ثلاث دنانير في السنة، خليهم يوخذوا عشرة أو عشرين دينار ويحلوا مشكلة المعلمين، المعلمين قلب البلد وكل الشعب معهم، وبتوقع كل ولي أمر بقدر يدفعهم وممكن يدفع أكثر اذا تأكد انهم بحلوا المشكلة أو حتى بساعدوا في حلها… يا عمي أنا بقول في مليون طريقة وطريقة للحل لو انهم مهتمين… طيب بشوفهم مرات بتحمسوا لشغلات اقل أهمية من مشكلة المعلمين وبفتحوا مزاد للتبرع في وسائل الاعلام وخلال ساعات بجمعوا ملايين… والناس يا عمي فيهم خير كثير وحريصين على الوطن وحريصين على أولادهم الطلاب و حريصين على اولادهم المعلمين… بس بدنا الكبار يتحركوا…

يا مسؤولينا… إلى متى تجاهل مشاكلنا؟!!

قراءة المنشور الأصلي على فيسبوك