مدونة عبد الله كريشانبحث

المتحولون

عبد الله حامد كريشان
رسم تعبيري لخاطرة «المتحولون»

لما بشوف افلام المتحولين الأفلام الأجنبية اللي بتتكلم عن المستقبل وعن الخيال العلمي، وكيف ممكن الانسان يتحول لاحوال وصور غير حسب الحاجة، ومع اني ما بحب هالافلام بالمره، بس للاسف بتذكرني في أحوالنا وامورنا احنا وكيف احنا كمان تحولنا من حال لحال… هالافلام مرات بتتخيل التحولات انها ممكن تصير بعد مئات السنين، لكن احنا في خمسين سنة بس تحولنا أكثر من خيالهم بكثير، قبل خمسين سنة كان اللي بصلي ما يكذب وما يخون، كان اللي بضحك في وجهك يحميك ويدافع عنك في ظهرك، كانت اخت الرجال لو لحالها في البيت تتحشم وتضيفك لحد ما يوصل رجالها، كانت الثقة… كان الشرف والأمانة أغلى من الروح، كان بر الاب والأم مقدم على النفس والولد والمال، كان الجار والمستجير أكثر من الرحم وأكثر من المحارم، اذا أي واحد بالحارة قال آخ… الحارة كلها والحارات اللي حواليها تفزع، كان الصدق… وكانت المروءة… وكانت الشجاعة… وكانت البركة… وكانت النخوة… وكانت الطيبة وكان الكرم… وكان… وكان… ما بعرف قديش ظل النا منها الحين…؟!!

ومع وجود الاستثناءات

ومع ان كثير والحمد لله ما تغيروا… لكن… شفتو قديش في ناس صاروا متحولين؟!!

حتى فرحة اللمات… حتى ريحة الطابون والقمحات…

حتى المحبة والخيرات…

صارت كلها ذكريات… صارت كلها ذكريات

قراءة المنشور الأصلي على فيسبوك