مدونة عبد الله كريشانبحث

أحلى من الفرنسية

عبد الله حامد كريشان
رسم تعبيري لخاطرة «أحلى من الفرنسية»

روايح عندي اياها أحلى من العطور الفرنسية، ريحة خبز الطابون لما تفتح غطا الطابون ويكون الخبز مقحمش، ريحة سنابل القمح لما تحرقها في البر انت والربع وتسوو فريكة، ريحة حطب النار وامك بتخبز عالصاج الصبح، ريحة الحارة وانت مروح عالبيت قبل أذان المغرب بشوي في رمضان، ريحة النظافة لما يكونن شاطفات البيت وتحط جنبية ومخدات على الشميمتو اللي بتلمع لمع وتكوع في الحوش العصر وقدامك ابريق شاي ازرق وتصب الشاي في كاسة جرس فيها نعنع، ريحة طابون جيرانكوا الفجر لما حجتهم تولع الجلة، ريحة القهوه وهي بتتحمس عالنار وانت قاعد في ديوان الشيخ، ريحة قلاية البندورة واللحمة اللي بسووها سواقين الشاحنات على جنب الطريق، ريحة دكاكين زمان وكوكتيل روايح الزعتر مع الصابون النابلسي مع الأعشاب مع ريحة الملبن والقضامه الفيصلية وبيض الحمام، ريحة صندوق جدتك لما تنزله من فوق الخزانة وتفتحه بتدور عالبخور وعود الند، ريحة حوش التراب في بيت الطين لما ينرش مي ويتكنس بمكنسة قيصوم، ريحة الدخان لما تكون مبطل التدخين والحج بولع سيكارة لف وجايب الدخانات من الشام، ريحة صحون الششبرك وهي بتتوزع على الجيران يوم الفضيلة في رمضان، ريحة خزانة الوالدة وهي حاطة بين الهدوم هانا وهناك صابونات لوكس معطر، ريحة المولود الجديد لما تحمله وتأذن في اذنه، ريحة هدومك وانت زغير ولابس الثوب الابيص المبخر والطاقية ورايح لصلاة الجمعة، ريحة احفادك وانت بتلعبهم بعد الحمام، ريحة الحجاج وهم راجعين من مكة ومنورين…

واحلى شي ريحة ابوك وامك كل ما تبوس روسهم واديهم…

قراءة المنشور الأصلي على فيسبوك