عشرون طلق

الحمد لله اجيالي عايشين، يعني ما في مجال للكذب، وانا زغير كان عندي بارودة فراخ، دمدم، وكنت احب صيد العصافير، بس لما اصيدهم كنت اكلهم، الصيد حلال، بارودة العصافير علمتني الرماية، اخر شي صرت اغز عود كبريت وارمي عليه.، ماهر مزبوط وغير شكل، في يوم اجازه اخذت بارودتي وطلعت من الساعة عشرة باتجاه البيارات، كانت البيارات قريبة من بيتنا كثير، بيارة ابراهيم خطاب، بيارة عبدربه بن محمد، بيارة بلح الله يرحمهم الجميع وآخر شي البيارة العليا . يوم المغامرة كنت يمكن في الصف السادس أو الاول اعدادي، من مبارح كنت مشتري عشرين طلق دمدم، وفي اليوم المشهود حطيت بارودتي على كتفي وتوجهت لبيارة بلح لان عصافيرها أكثر والسواقي فيها دايما جارية، أنا متذكر اني يومها صدت ١٨ عصفور بينهم حمامه برية، لما شفت الغلة هيك قلت الشغله بدها حفلة شوي، قعدت جنب الساقية ونتفت العصافير وغسلتهم ونزلت لآخر البيارة باتجاه وادي الشامية، حطيت العصافير على جنب ولميت حطب وولعت نار، اكيد كان معي كبريته من لما طلعت، يعني مبيت النية، شويت العصافير وتغديت عليهم بلا ملح وبلا خبز، ما بتذكر اني اكلت لحم غير الحمامه والباقي ما بدري شو اكلت فيهم،… لحد هانا الأمور جخة وكل شي تمام التمام…
لما روحت عالبيت… ااااه… يا حبيبي… تعال تفرج، اول شي لقيت الباب مدقر، دقيت، فتحتلي الوالدة الله يعافيها، لدت علي من فووووق لتحت، فسحمت، وكشخمت، وتغير شكلها، أخذت مني البارودة، قالت شو هذا؟ قلت شو؟ حطت ايدها ع خشمها، قالت ايففففف!! شو هذا؟! لويش مزخزخ هيك؟ قلت شو يعني مزخزخ؟ قالت ريحتك بتقتل متنتنة وبتقرف، شو مسوي؟ وقف عندك ولا تتحرك ما في تدخل البيت، فاتت جوا ورجعت عالسريع بتجر وراها بربيش المي وطاعجيته في ايدها يعني فاتحة المي وجاهزة، وفي ايدها الثانية باكيت تايد حجم وسط، جحرتني وقالت بعصبية قال بوريا، امي بس تعصب بتصير ترطن تركي ومرات بتصير ترود رويد… قلت شو يعني قال بوريا؟ سحبتني من كشتي لعند حوض الزريعة، وقالت وهي عاضه ع سنانها اشوف تعاااااال، قال بوريا يعني، بدي اطلعلك جلد غير جلدك، وفلتت المي ع راسي وعلى هدومي من فووق لتحت…
وراحت نشوة المغامرة وسالت كبرياء الصياد مع المي والتايد…
… بكرا ان شاء الله بدي اعاتب الوالدة ليش سوت هيك؟!