كلتش (دبرياج بالمصري) وبنزين

زمان سواقة أو قيادة السيارات كانت صعبة، كل شي زمان كان صعب لكن حلو، فيه متعة فيه حركة والحركة فيها بركة، وكل شي كان فيه بركة. عمان جبلية، كانت حركة السير بتتوقف وانت طالع بنص الطلعة، الجبل، لازم تدعس أو تدوس بنزين وكلتش مع بعض حتى السيارة ما ترجع لورا، كان سواق السرفيس يتحدى يقول انزل حط بكيت دخان تحت العجل الخلفي من ورا عشان يثبتلك ان السيارة ما بترجع معه لورا ولا شعرة، والسبب التوازن بين الكلتش والبنزين، طبعا مهارة وشطارة مش مثل سيارات الاوتماتيك بتسوق لحالها… كمان السواقة زمان كانت مع المهارة فيها كثير من الفن والذوق والاخلاق…
موضوعنا مش عن السيارات كانت هذي مقدمة بس، موضوعنا عن اجسامنا وكيف نقدر نتحكم فيها وكيف بالتوازن بين الاكل والحركة نقدر نوصل للوزن اللي بدنا اياه… كيف نزيد وزن اجسامنا وكيف ننقصه… أنا مش خبير تغذية لكن عندي تجربة شايف انها نجحت ويمكن يستفاد منها، خلال شهر ونص نزل وزني 15 كيلو… وعلى مدى شهور نجحت بالمحافظة على النتيجة اللي وصلتلها، 68 كيلو… مع التجربة صار عندي معرفة بالسعرات وصار عندي قدرة على التحكم فيها مثل ما كان السواقين المهرة زمان يوازنوا بالبنزين والكلتش… عرفت ان جسمي في وضع الراحة بصرف أو بستهلك تقريبا1800 سعر، بحسبها مجموع سعرات الأكل باليوم… اذا زادت كثير عن 1800 بزيد بالحركة والمشي والرياضة لغاية ما اتأكد اني حرقت الزيادة… اما خطة تنزيل الوزن
كانت الامتناع في البداية عن الخبز والرز والسكر نهائيا لمدة شهر ونص…
بصراحة الأكل الخفيف الصحي مع المشي والرياضة نشاط ومتعة ما بعدها متعة وسعادة كبيرة كلنا محتاجينها… لازم تجربوا وتشوفوا كيف كل شي بتحسن حتى المزاج بصير عال العال…
لاحظوا الصور قبل وبعد… بأمانة استفزتني صوري بالكرش