… كما تبدو

- شو مالك يا رجل بتجر رجليك جر… انت بتشكي من شي؟
- يعني مش شايف كيف هالطلعة!!… الواحد بدو يقلب على ظهره منها…!
- طبعا شايف… أنا ماشي معك… بس انت بالمرة دايخ… شد حيلك شوي…
- خلص يا اخي روح اسبقني… اقولك؟ اركض ركاض…
- لا ما بتخلا عن رفيقي… بس جد انت وضعك مش مزبوط بالمرة… كم عمرك؟
- عمري في الستين… وزي ما قالوا «ستين ويا رب تعين»
- كلنا بنقول يا رب تعين… بس الستين يعني شباب!! ليش انت عامل في حالك هيك؟!!
- شباب إيش يا حج!!!… خلص ختيرنا… وراحت علينا كمان… وزي ما قال جدي الله يرحمه… استوى العدس…
- عدس شو يا ابن الحلال؟!!! ليش معنوياتك هيك في الحضيض…؟! أنا جدي عكس جدك… تجوز الله يرحمه الثانية وعمره في التسعين وخلف ثلاثة…
- انت يا صاحبي فايق ورايق… روح يا خوي تجوز مين ماسكك…
- أنا ما قلت بدي اتزوج… أنا بقولك العمر والسنين مش مقياس… ولا تظل تقول عن حالك ختيرت…
- يعني شو بدك مني؟ مش فاهم عليك!!
- يعني ممكن يصير عمرك تسعين وتظل شباب وفي كامل صحتك ونشاطك… بس لازم روحك ومعنوياتك تكون شباب… وعالية…
- اه… روحي ومعنوياتي… ان شاء الله… توكل على الله… بصير خير…
- بتتمسخر حضرتك!!
- مهو كلامك بجنن…!! تسعين وشباب!!! ما صارت…!!
- لا يا سيدي صارت ونص… حتى في الأمثال قالوا
(عمر الرجل كما يشعر… وعمر المرأة كما تبدو…)