فعلا الشقق صناديق

مرة قلت للوالد الله يرحمه وكنت وقتها بشتغل في الإمارات، قلت بدي اشتري شقة في عمان، قال شو بدك في الشقة اشتري ارض احسنلك، الشقق صناديق، اشتري ارض بعدين بتبني عليها بيت زي الناس، بيت زي الناس في مفهوم الوالد الله يرحمه يعني بيت مثل بيوتهم زمان… بيتنا بيت الوالد زمان في معان كان بيت عادي لكن في اشياء كثير بتنحرم منها اذا سكنت في صندوق، يعني في شقة، البيت كان فيه حوش، كل بيت زمان كان فيه حوش، والحوش مساحة كبيرة مكشوفة للسما، وارضيته في الغالب اسمنت لكن بتنشطف بالمي كل يوم عالاقل مرتين بتصير الارضية من النظافة مثل المرايه، الحوش فيه احواض زريعة وشجر مثمر، وعلى داير الحوش في قواوير ورد اشكال الوان، ما كان في زمان قواوير كانوا يزرعوا الورد في تنك، لكن التنك مدهون ونظيف ومرتب، اغلب الناس في الصيف بشربوا الشاي بعد العصر في الحوش، وقدامهم زير المي فوقه سدر فيه بطيخة مشقحة سيور حمرا حمرا، والزير عليه خيشه طالع منها نبتات قمح أو شعير، كل حوش تقريبا فيه معرش دوالي عنب وسهرات الصيف اما تحت المعرش أو حول نافورة المي، بيوت زمان كان الها خرابة، وبصراحة ظلموها لما سموها خرابة لان الحياة كلها كانت فيها… فيها طابون للخبز وللصواني، فيها مكان لخبز الصاج،، فيها زريبة للغنم وقصيلة للمزروعات البيتية خضار للبيت وبرسيم للدواب، فيها خم للدجاج وللارانب، فيها بير مي مثل الزلال، وفيها ملعب للصغار… وفيها وفيها… .
بصراحة اول شي ان شاء الله ماتطول هالحبسة وربنا يسلم الناس والوطن والجميع، لكن اللي محبوس في بيت مثل بيوت زمان بتوقع ما بكون زهقان…
مش مثل حبس الصناديق