عرق العافية

خذ الحبتين واشرب هالكاسة الدافية واتدمل، تغطى كويس وان شاء الله بتعرق وبكون عرق العافية وبتقوم زي الحصان ما فيك شي… بتوقع كل واحد فينا لما فلوز أو صابه برد سمع هالعبارات، من امه، من ابوه، من جدته من مرته… بصراحة أنا فلوزت بس الحمد لله اني فلوزت قبل كورونا يمكن باسبوع، وربك ستر ولا كان اكلنا هوا، حتى لو بس شغلة نفسية، المهم أنا من زمان حتى وانا زغير ما كنت احس اني شفيت مزبوط من الفلونزا الا لما أعرق عرق العافية، وهذا مش مثل أي عرق، أنا في اخر فلونزا يمكن ثالث أو رابع يوم اخذت حبتين بنادول كولد اند فلو مع كاسة ليمون ونمت، طبعا متغطي كويس كويس وبدون يمين لما صحيت عند الفجر لقيت نازل مني كذا لتر عرق، المخدة مثلا العرق طالع منها من الجهة الثانية وملابسي بنعصرو عصر، أنا لما شفت الوضع ارتحت وفرحت، لاني حسيت انه عرق العافية، وان الفلونزا باذن الله راحت، وبالفعل راحت والحمد لله… طبيا أنا ما بعرف شو التفسير وايش بفرق عرق العافية عن العرق العادي… يمكن الاصدقاء الاطباء يفيدونا، لكن هذا الموضوع ذكرني بشغلات كثير كانت معتمدة في العلاج زمان وكانت تعطي مفعول… مثل لما تسمع جدتك ان لوزك نازلة بتقولك تعال وبتقعد انت بين ادبها وظهرك الها وجنبها صحن زيت زيتون وبتبدا تحط زيت على اصابعها وتدلك رقبتك من تحت لفوق لجهة اذانك وبتقول يا بنات الاذان ارجعن للمكان… عمكن عبد الله… ورزقكن ع الله…
ما بدي اطول عليكو أكثر بس بدي اختم هالخاطرة واقول
نسأل الله العظيم ان جميع المرضى المصابين بكورونا عندنا وفي كل مكان يعرقوا عرق العافية ويرجعوا لاهلهم سالمين غانمين معافيين.