بتتذكر؟… تكملة…

لحظة شوي.ياخوي ولحظة يا أولاد ويا أحفاد، لحظة، قبل كم يوم كتبت «بتتذكر؟» لكن لا تفرحوا كثير. ولا تتشمتوا فينا… بعدني ما خلصت الكلام، صح بعض المعلمين ضربونا لكن من حبهم فينا وحرصهم واحنا ع فكرة لليوم بندعيلهم بالخير . وصح انضربنا مرات من الاهل بالحفايات بس تراها مثل العسل على قلوبنا… لانه معها تربينا وتعلمنا كل اشكال الخير والمراجل والنظام والنظافة وحب الناس… بعدين تعالوا يا اولاد خلينا نشوف أيامنا والعابنا أحلى ولا أيامكم والعابكم… جاوبوني مثلا مين منكم بقدر يسوي سيارة اسلاك؟ أو سكوتر أو طيارة ورق؟ أو حتى فرينه؟ بلاش، مين أحسن اللعب في البلي ستيشن وعلى التلفون في البيت ولا اللعب في الحارة؟ شايفين أنا وهالختيار قدامكم… بجوز لو سابقتونا بالركض نفوز عليكم… ألعابنا كانت كلها حركة ورياضة… يومي كنا نلعب كره قدم ومزقر وطمية وكومستير وسبع حجار وغيره… وكنا نتسابق ركض ونتسابق بسكليتات ونتسابق دحلة… مش مثلكم بس متبطحين قدام الشاشات وطول النهار شبس وشوكلاطة… الواحد صاير مثل الدب…
حتى أغانينا زمان سمعتوا عنها؟ مثل طاح طاح سيف ابوي بالمراح، ويا عمي يا جمال سرقولك جمالك، سيفي تحت راسي ما بسمع كلامك، وطاق طاق طاقية… حتى أغانينا كانت كلها ركض وحركة وحماس… وازيدكم كمان، مين منكم راح رحلة جمع اعشاب في الربيع؟ أو رحلات كشافة على البسكليتات؟ أو راح مع ابوه أو مع اخوانه رحلات للبر… صيد ارانب ورماية؟ أو مين منكم شوى ارانب في البر وذاق طعمها؟ ومين ابوه خلاه يذبح معه الذبيحة ويقطعها؟ أو مين ساعد امه وهي بتخبز على الصاج أو في الطابون؟ ومين جاب بيض من خم الجاج؟ ومين لعب مع السخال والجديان؟ وحلب المعزه؟ مين راح عالبساتين والبيارات وتعربش على الشجر وقطع مشمش وتين وعنب وصاحب البستان بتفرج عليه وبقوله كل يا عمك زي ما بدك بس انتبه لا توقع وكمان لا تخرب.
ومين… ومين… مساكين يا اولاد ويا أحفاد راحت عليكو أشياء حلوه كثير…