قالب كيك

يله يا بنت ولعي البابور هي النكاشة والكبريته عند المجلى، وانت قوم روح عبي تبعت قالب الكيك رمل، بس رمل ناعم مليح، بدي اسوي قالب كيك للنسوان وان شاء الله يزبط، اسمع بعد ما تجيب الرمل بتلاقي تحت مشمع النملية نص نيرة خدها وروح مثل الطير جيب وقية نقرشة كويسة مو يعطيك محصمصه… وفي الباقي جيب جوز وذوقو لا يكون محنحن مثل المرة اللي فاتت، بدي احط ع وجه القالب… وانت يمه بسرعة اشطفي الحوش وافرشي الجنابيات والمساند عند الدالية كمان شوي موعد جيتهن، بصلن العصر وبيجن. مسحت الراديو الكبير وشغلته تتأكد البطاريات كويسات، لعلعت سميرة توفيق بتغني يا هلا بالضيف ضيف الله… قالت اوووه حتى الراديو محتفل فيهن… حطت الراديو على الطاولة جنب المزهرية، راحت عالمطبخ طلعت الصينية الجديدة من النملية وطلعت ست كاسات مذهبات مع صحونهن، عبت ابريق الشاي الازرق ابو كاسة ونص سكر عبته مي من الزير وحطت كمشة شاي عود، شاي ابو الولد وغطته، قالت بنتها وهي بتفرش الفراش يمه من الحين حطيتي الشاي؟ قالت اه عشان يخدر مليح، ما بدنا يتمقلن علينا، قطعت عرق نعنع اخضر من حوض الزريعة، غسلته وحطته في وحده من الكاسات، دخلت الغرفة، بتدور على اشي، وهي طالعة قالت وهي بتعض ع اصبعها كنت عارفة، ماكلين كل السلفانة خازقين البكيت من جنبه، الحين شو بدنا نضيف النسوان لما يطلعن… يمه… يمه… تعالي بسرعة شوفي القالب لا ينحرق ريحته طلعت… يا سلااام ما احلى ريحته… يمه لا توكلن القالب كله… خلولنا… اسكت يا ولد لا تفضحنا… النسوان عالباب، روح افتح…