مدونة عبد الله كريشانبحث

طخ المدفع طخ طخ

عبد الله حامد كريشان
رسم تعبيري لخاطرة «طخ المدفع طخ طخ»

السلام عليكم… الله يعطيكن الف عافية… بس شو هذا ارحمي حالك انت وبناتك؟ كل يوم هالعجقة؟! كل يوم تعزيل وكل يوم شطف!… ترى العيد مش بكرا باقي عنه اسبوع، المي واصله لاخر الشارع!. المهم… وين العيال؟ ناديهم بسرعة… بدي اخذهم معي للسوق اشتريلهم هدوم العيد ما ظل وقت، وبدنا لما نرجع نشم ريحة كعك مش ريحة صابون… اه احكي سامعك… ماشي ماشي بدك اشتري لكل ولد غيار كامل… وبدك قهوة وهيل وملبس وسلفانه… ماشي… في اشي غيره؟

يله يا اولاد امشوا قدامي… تعالوا نمر من الساحة تراهم جهزوها لالعابكم. مراجيح والعاب وحبال لمبات واعلام يله انبسطوا المراجيح صارت راكبة… ترى بتعريفه بتتمرجحوا لما تزهقوا. وشايفين بسطة الالعاب قديش فيها العاب… بواريد وفرود وسيارات وطخاخ وسحبه وألعاب أشكال وألوان… اشتروا زي ما بدكوا، بس لا تضيعوا كل العيديات من أول يوم… . اسمعوا ذكروني واحنا راجعين نشتري قطايف وجوز بدنا نتودع منه، وبدي اخليكوا تشوفوا كيف بسوو القطايف على باب الدكان في الشارع المنظر اشي بشهي. اليوم يا اولاد واذا الله راد بدي اخذكم معي مثل كل يوم لصلاة التراويح ونقعد نسمع الشيخ بعد التراويح لما ينشد لا اوحش الله منك يا رمضان، ترى بنشدوها في العشر الاواخر كل يوم. يله الحين خلينا نستعجل عارفكم مستعجلين أكثر مني مستعجلين تشوفوا الملابس الجديدة ومستعجلين ترجعوا حتى تروحوا تتفرجوا على مدفع رمضان وتحضروه لما يطخ عند الاذان… وترجعوا للبيت ركض وانتو بتغنوا بصوت عالي…

طخ المدفع طخ طخ…

قراءة المنشور الأصلي على فيسبوك