مالك؟… متهاوش مع غطاك؟

شو مالك يا بنيي من الصبح مكشر تقول متهاوش مع غطاك وانت نايم؟! ههههه، لا والله يمه ما في شي، أنا نفسي ما بعرف ليش بصير معي هيك. حتى قبل هالزفت كورونا وقبل الحظر وقبل الزهق. كان يصير معي نفس الشي، أنا لما بصحى من النوم وبلاقي نفسي قرفان هيك بسأل حالي ليش؟ لكن ما بلاقي جواب… يا حجه نفس الانسان غريبة ومعقدة، الله سبحانه وتعالى بقول (وفي انفسكم افلا تبصرون) يمه مع انها مستورة وكل شي تمام والحمد لله والواحد بعرف ربه وبذكره وبصلي وبقرأ قران وبستغفر وما بوكل حرام وبحاول يمشي بما يرضي الله، لكن مع كل هذا بتيجي عليه ساعات بكون مش طايق حاله، شغلات كثير يمه بتأثر في الانسان بدون ما يشعر فيها وبتتخزن جوا في قلبه، وبتصير تراكمات على تراكمات… الواحد كل يوم بتحصل معه مواقف بتضايقه لكن ما بكون قادر يتكلم عنها أو يناقشها أو يعالجها بكون الوضع مثلا ما بسمح أو ما بصير ينحكى فيه ما بده يحرج أو ما بده يجرح… مرات يا حجة اقرب الناس الك ما بفهم عليك… لكن الاصعب من هيك انك تنصدم في انسان عزيز عليك بتكون حاطله مكانة فوق فوق ومغليه لكن بتكتشف انك في واد وهو في واد… مش بس هيك بتكتشف كمان انك بالنسبه اله ما بتسوى شئ… صفر.، طبعا بتكون صدمة كبيرة الك وبتكتمها في قلبك… امور كثير يمه بتتخزن مثل هيك وبتتراكم… ممكن منظر أو تصرف تشوفه قدامك الصبح ينكد عليك طول النهار… وممكن موقف أو تصرف يوترلك القولون الصاعد والنازل وتقعد ثلاث اربع ايام متخربط ومش طايق حالك… كمان معاملة بعض الناس السيئة ممكن ترفع ضغطك للسما… وسلوكيات واخلاق بعض الناس في الشارع مش بس بتستفزك بتجلط وبطلعك من طورك كله… وبتقولي يا حجه مالك…!!! خليها على الله يا حجه… الله يطول عمرك… يابا وحد الله وطول بالك واستعيذ من الشيطان… استهدي بالله اشوف وامسح وجهك بالرحمن