حزيرة رمضان

رمضان جاي هالسنة في نيسان، وشمس نيسان مطلوبة، الكل بحب يتشمس، ام العيال مشغولة في شغل البيت وفي الطبخ، الراديو على الرف مفتوح، بعد شوي بطلع مسلسل الف ليلة وليلة، وفؤاد المهندس، هي ما بتابع لا مسلسل ولا غيره… بس الراديو على طول مفتوح… البنات الزغار صايمات وقاعدات على الارض بلعبن حاريدا باريدا… الاولاد كمان صايمين وكلهم في الحارة، بعد ما جابوا الاغراض من السوق راحوا يلعبوا، العابهم كثير، ناس بلعب قلول وناس بلعب حاب وغيره، حتى الزلام بدهم يسلوا صيامهم بتشوفهم من بعد صلاة العصر متجمعين في الحارة جنب الحيط بتشمسوا، الصيام مأثر عليهم كثير، واحد طاق اللثمة لخشمه، وواحد حاط جاكيته على الدمس ومكوع عليها، الدخان ذابحهم ذبح، المشكلة كلهم بدخنوا، المصحصحين شوي منهم قاعدين بلعبوا سيجة، ومرات بتولع معهم، وبطلع صوتهم، وكل شوي بتسمع واحد بفغر مبسوط… جروك مات… الشباب بعضهم بلعب بلابل والكسلانين مبحطين عالارض بلعبوا طاب يا عود… قبل الاذان بنص ساعة ما بظل ولا واحد في الحارة، كل واحد على بيته ما عدا الزغار مستحيل يروحوا الا بعد ما يطخ المدفع…
السفرة صارت مفروشة عالارض وعليها نعايم الله اشكال والوان، اشي من طبختهم واشي من طبايخ الجيران… الزلمه طلع من جيبته باكيت كمال حطه قدامه وحط فوقه الكبريته… قال لا جوع ولا عطش بس هالماخوذ الدخان… قالت الله يقطع نصيبك منه…
الله اكبر الله اكبر… صوت المدفع هز الارض… بسم الله، مع فطورهم الشيخ في الراديو بدعي للجميع
… بعد الفطور بشربوا الشاي وبتطلع في الراديو حزيرة رمضان، كلهم بستنوها…
حزيرة رمضان أحلا الحزازير
فكر فيها شوية ماهي صعبة كثير
والجائزة عيدية من رمضان كريم