مدونة عبد الله كريشانبحث

القرية غير

عبد الله حامد كريشان
رسم تعبيري لخاطرة «القرية غير»

يا بني الله يسامحك بس، شو سويت فينا؟ جبتنا وحبستنا في هالقفص… المدينة… المدينة… دوشتنا واكلت روسنا في المدينة… بدك نيجي، تعالوا بتتسلوا… تعالوا بتشوفوا الحياة كيف… هي احنا جينا… وينها الحياة؟ هي الحياة بس بنايات واسكانات وسيارات وزحمات؟! لا يا بوك… الحياة مش هيك… وين الحياة اذا جارك في نفس العمارة ما بعرفك ولا بتعرفه… وين الحياة اذا اللي بتسلم عليه في الشارع بجحرك في عيونه مستغرب ليش تسلم عليه…؟ نسيت يا بنيي حياتنا كيف كانت في القرية… كيف اذا فرح واحد في القرية كل القرية بتفرح معه َواذا حزن واحد كل القرية بتحزن معه… كيف اذا مرض واحد القرية كلها بتزوره… واذا تزوج واحد الكل بغنيله… باب بيتك في القرية مفتوح للجميع ما في لا ما عندي وقت ولا لازم مواعيد… اطفالك وين ما لعبوا ووين ما راحوا ما بتخاف عليهم كل القرية بيتهم وكل القرية ملعبهم… سهرات الناس في القرية وتعاليلهم مع بعض… عوناتهم وفزعاتهم مع بعض، حتى مشاكلنا في القرية مثل العسل ع قلوبنا… واكبر اكبر مشكلة بتنحل في بيت الشيخ بقعدة… استاذ المدرسة اب لكل الاولاد والمعلمة ام لكل البنات، الممرض والطبيب اذا ختيار في القرية قال ااخ بتلاقيهم عند راسه في البيت… وراعي الدكان لو توخذ بضاعته كلها ما قالك وين رايح… في حوش بيتك حواليك ورد وفوقك سما صافية واذا وقفت ع باب بيتك بنشرح صدرك… بتشوف جاجاتك وغنماتك حواليك… بتشوف السهول الخضرا والجبال… حتى نجوم السما والقمر في الليل بسهروا معك…

يلاا يابا خلص روحنا ع قريتنا اشتقنا للناس واشتقنا حتى للمشي، رجلينا تربطوا عندك في هالحبسة… وخلينا نروح نشم هوا زي الناس بدل دخان السيارات… وخلينا نصحى الصبح ع صوت الديك بدل زوامير سيارات الغاز…

قراءة المنشور الأصلي على فيسبوك