مدونة عبد الله كريشانبحث

شرط غريب

عبد الله حامد كريشان
رسم تعبيري لخاطرة «شرط غريب»

يا جماعة اسمعوني، أنا ما قلت شي، بالعكس أنا بدي البنت، البنت محترمة وفهمانة وبنت ناس، وكل الناس اللي سألناهم عنها وعن أهلها شكروا فيهم، وقالوا عنهم ناس أكابر ومحترمين، وانت يابا وانت يمه ترشيحكم واختياركم ممتاز وفي محله، وأنا لو الف الدنيا كلها ما بلاقي مثلها، أدب ودين وأخلاق وجمال… الغريب ان البنت لما قعدنا قدامكم أنا وهي نتكلم مع بعض على جنب حسب طلب أبوها وأمها… قالتلي من أول كلمة بصوت واطي وهي مرتبكة ان أبوها موصيها تحكيلي من البداية ان راتبها كله لأبوها، أنا بصراحة ما عندي مشكلة، وأكيد أبوها من حقه كل شي… ويمكن محتاج… تعب وربى وعلم وصرف على أولاده دم قلبه، وأكيد كمان بعد ما تخرجت ما خلا واسطة الا راحلها… وراح للكبير وللصغير حتى شغلها في هالوظيفة… كل هذا أنا بعرفه ومقدره، ومع اني كمان متأكد ان راتبي لحاله ما رح يعيشنا مثل الناس وممكن ما يكفينا… لكن صدقوني أنا ما فكرت في موضوع الراتب بالمرة ولا خطر في بالي، مستحيل أنا افكر هيك… هذا راتبها وهي حرة فيه… بس أنا مستغرب المعروف بين الناس ان الآباء بحطوا من جيوبهم لزواج ولسعادة بناتهم وهم مبسوطين… ولو قال الشرط راتبها إلها يمكن أرحم… عشان هيك أنا تفاجئت وانصدمت،… واللي ضايقني أكثر انه يشترط هالشرط من اول قعدة معهم ومع البنت ومن اول كلمة… بصراحة أنا توغوغشت… وما اتقبلت الموضوع… .

قراءة المنشور الأصلي على فيسبوك