مدونة عبد الله كريشانبحث

بدها طشة وتخييم في البر

عبد الله حامد كريشان
رسم تعبيري لخاطرة «بدها طشة وتخييم في البر»

قال لو بدها تكلفني الف دينار هالطشه بدي اسويها… ما بدي مزارع ولا خرابيط… حط الخيمة وكل لوازم التخييم في البكم ابو كبينتين وراح سوق الغنم، اشترى طليان اثنين الواحد عمره شهرين، ومن سوق البدو اشترى الطحين وادوات الطبخ والقهوة والشاي جاب حطب وفحم واشترى من السوق مونة اسبوع كامله بتكفي فطور وعشا ولوازم سهرات فواكه ومكسرات وحلويات لأربع اشخاص… جاب ست قوارير مي وثلاجة كولمان اكبر حجم… مر على الكازية فلل البكم وعبى ثلاث جركنات ديزل احتياط… حط الجفت والبارودة ومجلد الفشك تحت الكرسي الخلفي، قال لام العيال بعد ما امنهم بكل شي، خاطركوا… بعد اسبوع ان شاء الله برجع لا تستنوني وديروا بالكوا ع حالكوا… مر على اول صاحب زمّر لقاه جاهز… ركبه… مر عالثاني لقاه مقربز عالباب بستنى… ركب، وهم بالطريق رن الرابع عليهم استطولهم… قالوا دقيقتين بنكون عندك… اصحابه لما ركبوا قالوا ميل عالسوق بدنا نشتري شغلات قال بالحرام ما واحد بنزل ولا واحد بشتري اشي جبت كل شي حتى دخانكوا عارفه وجبت لكل واحد كروزين… طيب والشدة؟… قال جبت اربع شدات العبوا لما تشبعوا طرنيب، اتركس، هند، بناكل… حط القير عالرابع وقال ما حد يسالني وين رايحين… هو خبير رحلات وما خلا محل ولا خزق في الأردن الا وخيم فيه…

بعد ما وصلوا وبنوا الخيمة ورتبوا كل الامور سألهم… هااا… كيف؟ وايش رايكوا الحين…؟ قالوا أحسن من هيك عبث… هذي هي الحياه ولا بلاش…

(مقترح طشه لأربع اصحاب متجوزين ذبحهم الزهق من حبسة كورونا)

قراءة المنشور الأصلي على فيسبوك