بسكوت وراحة

- بتصدق اني اكلت كنافة سنة 1966؟
- بصدق… بس معان ما كان فيها كنافة في هذاك التاريخ!!
- لا أنا أكلتها في نابلس… نابلس يعني في منبعها… رحنا رحلة مدرسية للضفة الغربية وزرنا القدس ونابلس والخليل ورام الله وجنين والبيرة وقلقيلية وطول كرم ووقفنا على الشيك الفاصل بين الظالم والمظلوم… وكلمنا الفلسطنين اللي كانوا في جهة اليهود
- الله… الله يفك اسرها واسرهم ويحررها يا رب…
- اللهم آمين… وصلينا في الاقصى وفي الصخرة وزرنا الحرم الابراهيمي وقعدنا 18 واحد في قدر من القدور اللي بطبخوا فيها مرقة الخليل… يا اخي الضفة الغربية جنة وضاعت…
- لاحول ولا قوة الا بالله… لكن هذي رحلتكم مرتبة…
- اه والله ما بنساها… وزرنا في نابلس مصنع صابون النعامة… يمكن هذا سر اني بحب الصابون النابلسي وما بستغني عنه للحين…
- وشكلك يا صديقي كمان بتحب الحلو
- اه والله… كثيييير
- وايش كانت حلويات زمان يا ابو الحلو؟
- عد على اصابعك وبجوز اصابعك ما يكفو:
(هريسة عيسى… عنبر ابو محمود… عوامة عبدالكريم. ملبن وقضامة فيصلية وتوفى وبيض حمام من عند جميل الترك… ملبس شوب وكعكبان من عند ابو عاشق… هذا كله من السوق اما من البيت: فطيرة سكر… شعرية بسكر… رز بحليب… واذا امحلت وامحلت… حلاوة من العلبة…
- ما شاء الله كل هذا! كويس اللي ما عندك سكري…
- الحمد لله ما عندي… بس استنى بعدني ما خلصت… اذا كل ما سبق ذكره لم يتوفر كنت اخترع اختراعات
- عظيم يا مخترع… مثل شو؟
- في اختراع عام الكل كان يسويه… هو بسكوت ماري بتعريفه وكم حبة راحة كمان بتعريفه ونحط كل حبة راحة بين بسكوتتين…
- يا سلام… والاختراع الخاص شو هو؟
- قضامة صفرا احط فوقها كمشة سكر واطحنهم في الهاون مع بعض… بتطلع خلطة غير شكل… وصحتين وعافية…