مدونة عبد الله كريشانبحث

اه ولا مو اه… اقولكوا قصة الذبانه؟

عبد الله حامد كريشان
رسم تعبيري لخاطرة «اه ولا مو اه… اقولكوا قصة الذبانه؟»

ما كان في لا تلفونات ذكية ولا بابجي، لا تواصل اجتماعي، لا فيس ولا واتس، لا تويتر ولا انستغرام… ما كان في دشات ولا فضائيات ولا شاشات، ما كان في بلي ستيشن فور ولا ثري ولا اتاري، حتى تلفزيونات عادية ما كان في… قبل النوم… يمه قوليلنا قصة، اذا متجليه معها، يعني ما كان يومها شغل حراث، ما في تعزيل، ولا طبخة كرش، ولا الغسيل ابو سبع حبال، بتقول ماشي تعالوا بقول لكن بعد ما تصلوا عالنبي، اللهم صل وسلم على سيدنا محمد… بدكوا قصة محمد الشاطر ولا أم المسابح ولا سولافة الكذب؟ طبعا بنكون سامعين كل وحده من هالقصص اقل شي ميه وخمسبن مرة… لكن مش مشكلة… لأنه ما في بديل… بنختار… أما اذا المزاج يومها مش رايق بتقول اشوف حلوا عني… روحوا ناموا، واذا لزقنا… بتتخلص منا يا اما بقصة من قصص الجن… أو بواسطة قصة الذبانه

اقولكوا قصة الذبانة؟ اذا قلنا اه… بترد

اه ولا مو اه… اقولكوا قصة الذبانه؟

ييييه!!!

يييييه ولا مو يييييه اقولكوا قصة الذبانه؟

لأ

لأ ولا مو لأ… اقولكوا قصة الذبانة؟

اشي بزهق

طبعا بنزهق وبنقول خلص… رايحين عالنوم

شووو؟ وين رايحين؟

عالنوم…

والحمام؟ يله اشوف عالحمام، ولا ناوين (تدلجوها) عالمنام؟!!

قلبت بغم… وانتهى الكلام…

قراءة المنشور الأصلي على فيسبوك