مدونة عبد الله كريشانبحث

وقف ع رجل وحده ودير وجهك للحيط

عبد الله حامد كريشان
رسم تعبيري لخاطرة «وقف ع رجل وحده ودير وجهك للحيط»

يوم السبت تفتيش على الاظافر… لازم محرمة قماش نظيفه وايديك الثنتين ممدودات قدامك، اظافرك كلهم لازم يبينوا… عصاتين أو ثلاثة على قفى ايدك اذا ظفر واحد بس مش مقصوص أو وسخ… قرط الاظافر يومها لابو موزه… قبل التفتيش اذا جاي عالطابور شوي متأخر وحتى لو نفسك مقطوع وبتلهث من الركض بدك تنسلخ على جنابك كم عصاه وانت بتركض، اذا حظك كويس بتجي العصي عالكتب… الاستاذ المناوب كل استاذ عصاته الها اسم معروف، المدرسة كلها بتعرفها، واحد عصاته اسمها سعده وواحد عزيزه وواحد ام دبسه… غير المطارق… وخلي طالب يستجري يطلع في الممرات أو حتى يطل راسه من باب الصف بين الحصص… يا ناس لا تحسبوني كاين كسلان أو مشاغب لاني بسولف هيك، أنا بدون يمين ما جربت اغلب اللي قاعد بسولف عنه بس هي معلومات حتى ما تنسوها، وجيلي اكيد بعرفوها… ما بدي اتكلم عن العقوبات الراقية، وقف يا ولد ع رجل وحده ودير وجهك للحيط وطبعا الولد بقضيها بضحك وبتزغزغ. ولا يا اولاد بكرا الصف كله لازم ينسخ الدرس عشرين مره لان خطكوا زفت وزي خرابيش الجاج… الرجلين المربوطات ومرفوعات فوووق… بتعرفوها، الفلكة، بتوقع كل كسلانين ومشاغبين الستينات ذاقوها في الصف الاول والثاني… اقلب ايدك يا ولد وعلى قفاها في حفة مسطره الحديد، ومع كل مسطره الشرار بطلع من عيونك… هذي ولا شي مقدور علبها… سلخة في السنسال على راسك وانت ساهي مع خلع وحده من اذانك من محلها لانك بتتكلم مع اللي جنبك… برضه مو مشكله… الكفوف عالرقبة والشلاليت عادي وما بنحكى فيها… اما قلم الرصاص بين الاصابع وايد الاستاذ بتضغط ع قد ما الله اعطاه عزم، هذي بتطلع الروح، كيف بدك تنساها… كل واجب انت مش حاله عصاتين عالاقل واضرب في خمس حصص عند بعضهم… اهم شي يا بطل انك ما تصيح أو تقول اخ أو تتوجع… عيب… المدرسة كلها بتعيرك وبتمسخروا عليك لاخر السنة، اذا الاستاذ اللي ساكن في حارتكوا شافك بتلعب في الشارع اول ما يشوفك بجحرك في عيونه، وتعال يا حبيبي… داير في الشوارع ليييش؟ افتح ايدك… اربع عصي عالماشي… اذا الشغله قلة ادب ومسبات أو سرسره… تدخين أو غيره… غضب الله بنزل عليه البعيد، اقل شي ثمان عصي وانقلع جيب ولي امرك… اللي بكمل عليه قبل ما يعرف شو القصة…

بالفكاهة وبالرضى والامتنان نتذكر كل هذا… وبالحب والاحترام والترحم والدعوات الصالحة نتذكر كل اساتذتنا الكرام… جزاهم الله خير الجزاء

قراءة المنشور الأصلي على فيسبوك