كوننت

أحسن شي سواه جدكوا الله يرحمه انه لما بنينا بيت الأسمنت ما خلانا نهد بيت الطين قال خلوه مالكوا عنه غنى… والحمد لله ما في بين البيتين غير حيط، يله يا عيال الدنيا كوننت سكروا كل ابواب بيت الاسمنت مليح هذا الأسمنت بارد ومصبصب وما بنسكن بالمره في كانون، احنا من الصبح نقلنا كل أغراضنا وهدومنا لبيت الطين، بيت الطين ادفى وابرك وبدنا نقضي كانون والشتوية كلها فيه، هي امكوا والبنات رتبن كل شي… وانتوا يله روحوا المخزن طلعوا منقل الفحم الكبير وعبوه فحم وولعوه مليح في الحوش لحد ما الفحم يجمّر مزبوط مزبوط مشان ما يوجع روسنا واذا صار جمر بتدخلوه ترى الليلة برد موت وسميطة وانا اذا ما بشوف المنقل بين ايدي ما بحس بالدفى، ترى الصوبة لحالها ما بتكفي… وانا الصحيح ما بفش قلبي غير منظر المنقل والجمر… بعدين لازم اقحمش الخبزات عليه واسوي الشاي واشوي البطاطا اللي بتحبوها، وكمان انبسطوا يا عم هي امكوا اليوم ناويه تسويلكوا بعد العشا فطيرة سكر أو شعرية وسكر… ويمكن تسويلكوا كمان اقراص عالبابور… وانتِ يابا الله يرضى عليك هاتي الفروة وافرشي الجاعد فوق الجنبية وحطي المراكي… وجيبولي الربابه ترى جاي عبالي الليلة اهيجن
اااااااه
طيري سرح وابعد المسراح
لا واحلالاتي يا طيري
شوحتلو وابعد المشواح
واثاري عينه على غيري