مدونة عبد الله كريشانبحث

مراية مُكبِّر

عبد الله حامد كريشان
رسم تعبيري لخاطرة «مراية مُكبِّر»

يعني ضروري الا تطلب مراية مُكبر؟! خير ان شاء الله!! يعني شو متوقع تشوف؟ وائل كفوري مثلا؟ ولا قمر الزمان؟ ليش ما ظليت ع بركتك لابد وساكت… يعني مالها مرايتك العادية؟! ما انت صارلك نص قرن مكيف عليها وع حالك معها؟ ومع عيونك المغبشات ونظاراتك كعب الكباية طبعا ما بتشوف شي من البلاوي… ما بتشوف غير اللي بدك تشوفه… خصلة الشعر اللي ربنا خلالك اياها قدام ومصدق حالك ع اساس راسك كله شعر والزحاليق والمطار اللي ورا ما ناس شايف… بعدين تعال جاي… كل يوم واقفلي قدامها مبتسم ابتسامتك العريضة تبعت التصوير، وما شاء الله عليك معبي الفيس صور، كل يوم منزل صورة! خير يا طير!! يعني ما بعرف ليش! يمكن متوقع مخرج مسلسلات مصري يشوفك ويسويلك مسلسل مثل مسلسل مهند التركي…!! يمكن… كل شي بصير…

طيب تمام والحين بعد ما جابولك المراية المكبر ارتحت وانبسطت؟! يعني إلا تنكش ع حالك نكشات؟! هيك تمام؟ شفت البلاوي؟ واتضحتلك الصورة مليح؟ تأكدت ان اللي باقي في راسك ست سبع شعرات سود وشكلهم بالغلط… شفت حواجبك كيف صار شعرهم اشي مكورب لتحت واشي مكورب لفوق… شفت ان السمار اللي في وجهك واللي حضرتك فرحان فيه انه مش سمار اسمر عبر… ولا سمار ابو سمره بسكره… لا يا حبيبي… هذي كلف مثل الكلف الشمسية… نمش وبقع سودا بس مرايتك العادية كانت تجاملك… كمان شفت كيف الخطوط والجور في وجهك مثل جور الخط الصحراوي قبل التصليح… بعدين انزل شوي لتحت عالرقبة وشوف كيف الزوايد صارت؟ اه الزوايد اللحمية اللي كنت تضحك على الاولاد تقولهم هذول شامات… شامات ايش يا رجل؟ الوحدة قد حبة القضامة الفيصلية…!! واخر شي شفت التجاعيد اللي في رقبتك!!! صايره زي السعن الناشف… ولا هذول رسم تجميلي تشكيلي؟! يعني خير وخاتمة خير…

انبسطت هيك؟ خليك بتستاهل…

قراءة المنشور الأصلي على فيسبوك