ماكينة سينجر

قالت يمه الله يرضى عليك يا بنيتي هاتيلي علبة الخياطة بتلاقيها في الكومدينو اللي تحت المنام ولظميلي الابره بخيط أسود ترى بطلت أشوف مليح وبطلت أقدر الظم الإبرة انت ما شاء الله بتشوفي أحسن مني، لظميها وهاتيها خليني اخيط واقطّب جرابات ابوكي واخوكي كل جراباتهم مخزقات من عند الإصبع الكبير… كمان تأكدي يمه اذا الكشتبان موجود في العلبة، واذا ما لقيتيه دوري عليه يمكن وقع في درج البيرو التحتاني… ايييهيي… شايفه!! بنطلون المسعد اخوكي كمان ممزوع من عند ركبته، أبصر هاظا بتخيط ولا لأ… كل بنطلونات اخوكي زي هيك امززعات من عند الركبه ومرقعات… فضحنا… كله من لعب الفطبول ومن التزحلق عالاسفلت… محنا ملحقين عليه بنطلونات… اااه… صحيح تعالي جاي مليح اللي اتفطنت… َمنو اللي مخرب ماكينة الخياطة؟ هااا؟ في ناس لاعب فيها… اكيد يا انت يا خيتكي المقرودي اكييد كاينات تخيطن عليها فساطين لعباتكن وخربتنها… العصر اجيت اخيط فيها الملحفه ما رضت تخيط، اذا عرف ابوكي غير يفضح الدنيا… هذي ماكينة سينجر غاليه وما بتتصلح غير في عمان… يله يا بنت تحركي وخلصيني… كل هاظا بتدوري عالكشتبان… خلص بطلت ما بدي اياه… تعالي بس اشوف ولعي البابور وحطي عليه المكوايه خليها تحمى… ياااا ربيييي… كل هاظا كوي؟ كوم كوي!! متى بدي اخلص كل هالكوم؟ أكره ما علي الكوي… كل شغل البيت عندي كوم والكوي لحالو كوم… بقطع الظهر… واني ظهري خلقه بوجعني… الله يعيني بس… تعالي يمه الله يرضى عليك امسكي ايدي وقوميني… يا الله.