أم الخير

قالت أم الخير لزوجها وهي معصبة:
يا ابن الحلال ما بنفع هيك!! بهدلتنا وبهدلت حالك… كل شغلك وكل تصرفاتك غلط في غلط… معتمد في كل حياتك وفي كل أمورك وأمورنا على الناس، مش تارك لا قريب ولا غريب إلا بتطلب منه وبتوخذ منه وانت ما شاء الله عليك مش ناقصك ولا شي، ربنا معطيك زي الناس وأكثر من الناس، صحة وعضلات وعقل وعيال وأرض وخيرات بس يا خسارة مش مستفيد منها شي ومش مستغلها مثل العالم والناس… حتى المي اللي بتسقي منها الشجرات وبنشرب متها ساحبلك ماسورة من بيت ابو فلان… والكهربا ماخذلك سلك من بيت أبو علان… أرضنا ما بدك لا تعمرها ولا بدك تزرعها… و بدك كل شي يجيلك عالجاهز، هاظا يجيبلك قمحات وهاظا يجيبلك حليبات… وبتستقرض من زيد وبتدين من عبيد… لما تشرشبت في الدين تشرشب، والمشكلة انك مش مهتم ومش مكترث… ووصلت فيك وفينا الأمور ان الناس صاروا يتحسنوا ويتصدقوا علينا وانت ولا على بالك… ما بصير هيك… شو هالعيشة اللي كلها شحدة في شحدة واحنا قادرين نكون أحسن الناس واغنى الناس… ليش نرضى بالذل واحنا قادرين نعيش بعز وكرامة؟!! وليش نظل تحت رحمة اللي بسوي واللي ما بسوى؟! ما فكرت يا رجل انه اذا بزعلوا منك هذول اللي انت معتمد عليهم شو رح يصير فيك؟ وايش رح يصير فينا.؟ ان شاء الله بتحسب اللي بعطوك هذول بعطوك لله أو لسواد عيونك؟ لا يا حبيبي… كل واحد فيهم عنده هدف وكل واحد فيهم مخططلك شكل وناويلك على نية… ويمكن فيهم اللي بكرهك ومستني اللحظة اللي توقع فيها حتى يفرمك فرم… اصحى يا رجل مشان الله وفوووق…