مدونة عبد الله كريشانبحث

لا تنطوا من فوق يا ولاد

عبد الله حامد كريشان
رسم تعبيري لخاطرة «لا تنطوا من فوق يا ولاد»

بعض تصرفاتنا كانت غلط كنا نعرف، لكن شو تقول، ولدنة وطيش عيال، أكبر واحد فينا كان عمره ١٢ أو ١٣ ويمكن ١٤ سنة… العطلة الصيفية طويلة كثير، ما كنا ندخل البيوت إلا للأكل وللنوم، ألعابنا كلها كانت برا، في الحارة أو في الفضاء الطلق… الدار الحمد لله أمان والكل مطمن علينا… مشان هيك كنا نسرح ونمرح على كيفنا ووين ما يخطر على بالنا كنا نروح… ألعابنا مالها عد اشي عام ومعروف واشي نخترعه… لما نزهق من كرة القدم نلعب مزقر، المزقر لعبة مثل الكريكت، ولما نزهق من المزقر نلعب طميه أو كمستير أو حتى جاجي عميا، نلعب طيارات وفرينات وبلابل ونلعب اسكوترات من صناعتنا… لما نكون مفلسين وما معنا نشتري قلول كنا نلعب في بزر التمر أو في ازرار الملابس… طاق طاق طاقية ويا عمي يا جمال سرقولك جمالك العاب كانت البنات الصغيرات تشاركنا فيها، وزي ما البنات إلهن ألعاب خاصة فيهن مثل الحجلة وشبرا قمرا شمس نجوم وحاريدا باريدا… كان إلنا إحنا الأولاد ألعاب خاصة كمان… غير كرة القدم والمزقر والحاب والطاب و سبع حجار… كان من ألعاب القلول، القلول لحالها عشرين نوع ونوع… كنا نحب نغير ونتفنن، أيام نخصصها لسيارات الأسلاك وأيام لصيد العصافير بالفخاخ أو بالخردق، و الفخاخ لحالها حكاية بدها مسلسل مثل دكانة عبد الله… مصطلحات ومغامرات، شحيميات (دود الطعم) وأنواع عصافير… وغيره، بعض الأيام كنا نخصصها للمسابقات مثل سباقات الركض والرجيمية (رمي الحجار لأبعد مسافة) والمعليقة والزتاتة… وسباقات الدحلات والعجلات والبسكليتات للي عندهم بسكليتات، وأيام نخطط لطلعات برية بعيدة نلقط فيها اعشاب، ربيع الصحراء بتأخر كثير خصوصا اذا كانت سنة خير… كنا نطلع محموعات مع بعض القرايب الكبار نلقط كهموم وشحوم وقعفير اغلبها كنا نوكلها على طول أو في الطريق. وللبيت نجيب شيح وقيصوم وبعيثران… اعشاب طبية…

لحد هيك الأمور طبيعية وما فيش ولدنة، لكن الولدنة اللي كنا نتبهدل عليها كانت العاب القمار والتقميش مثل لعبة الفنه، والفنه للي ما بعروفها لعبه نقود ومصاري معدنية مثل كتابه وملك في مصر… ما كنا نستوعب انها حرام أو انها مثل القمار. كنا نحسب ان القلا قلا بس هو الحرام… ومن الولدنات اللي كنا نتبهدل عليها (التقميش) انك توخذ القرش أو التعريفة اذا صبتها عن بعد في القلول، أما أكبر مشاكلنا كانت (النط على البساتين صح كانت نادرة بس كانت تحصل) نقطع مشمش وتوت وقرايص وتفاح وعنب وتين حسب المتوفر… أكثر هجماتنا كانت على بساتين الشامية مش بس لانها قريبة علينا لكن لأنها كانت مغرية… كانت من أجمل الأماكن في معان، فيها عين مي مثل عين موسى وفيها غدير بينسبح فيه… واكثر شي كان يشجعنا طيبة قلوب أصحاب البساتين وصبرهم علينا وطولة بالهم كانوا يسامحونا شو ما سوينا وبالعكس كان بعضهم يقطعلنا ويطعمنا لكن كنا نتبهدل ونوخذ كلام زي السكاكين في جنابنا، كانوا يقولولنا ما بصير تنطوا هيك من فوق السور زي الحرامية، عيب وحرام وكمان خطر عليكم ممكن تتقطموا وتتكسروا… اذا جوعانين تعالوا عادي من الأبواب واطلبوا وقطعوا وكلوا زي ما بدكوا بس لا تخرّبوا…

أيام زمان كانت غير وناس زمان كانوا غير وحتى ولدنة زمان كانت غير…

قراءة المنشور الأصلي على فيسبوك