مزيونة ونشيطة ومتكتكة

قال لأمه يمه خلص وافقت أتزوج زي انت ما بدك بس ترى يمه ما بدي أي عروس وما بدي إياها من بنات اليوم بنات الموظة والاظافر المايصات، بدي إياها عروس غير شكل، عروس مرتبة، بنت ناس وخلوقة ومتدينة وبدي اياها مزيونة ومثل نسوان زمان حشمه ونشيطة ومتكتكة وشاطرة وبتصحى من الفجر وبترضى تعيش مع العيلة وبتقوم في واجبي وواجب اهلي وبتعرف تخبز على الصاج وبتعرف تخيط زرار قمصاني لما يتقطعوا وتخيط جراباتي لما يتخزقوا… بدي إياها ست بيت ومدبرة بتسوي مقدوس ومخلل ومربي معقود وبتفرز فول اخضر وورق دوالي وسبانخ للشتا… وبتعرف تسوي مونة البيت زي نسوان زمان… وبدي إياها تعرف تشتغل كل شي على ايدها، تغسل وتكوي وتطبخ طبخات زمان، ويا سلام اذا بتطبخلي كرش وكوارع… يمه ما بدي إياها مدلعة شغل خدامات وصالونات وكوافيرات ودراي كلين ودلفري وأكل جاهز ماكدونالد وهامبرغر وكنتاكي… إنت بتعرفيني إذا ما بغمس تغميس في الأكل ما بشبع… وما بدي تجيبيلي وحدة إذا قلتلها اطبخيلي كوسى محشي تقولي روح اشتري كوسى محفورة ما بعرف احفر…
بس بس أشوف اسكت وانطم، قالت امه، شو قاعد بتخربط انت؟!… مالهن بنات اليوم؟! ما شاء الله عليهن متعلمات ومربيات وفهمانات مثل خواتك وأحسن… بس انت شكلك فقري في شدوقك هذول ومالك في الطيبات نصيب… و فلسفتك هذي غير تضيعك… شو رايك اشوفلك صاحبة جدتك عارفها؟ صاحبة المطعم الشعبي؟ اللي عنست من خمسين سنه… خلينا نجوزك اياها، صحيح هي على حفة قبرها بس متوفر فيها كثير من طلباتك وشروطك… بتخيطلك جراباتك وبتخبزلك عالصاج وبتطبخلك كرش وكوارع… انت يا غبيران على شروطك هذي لازمك مصباح علاء الدين وتظلك تفرك فيه لما يطلعلك المارد ومش اي مارد بزبط معك… بدك مارد من اللي كانوا على ايام سيدنا سليمان… وبجوز يقولك رجعني بسرعة عالمصباح طلبك ما في منه… طلبك انقرض من زماااان…