مدونة عبد الله كريشانبحث

إلتمس لأخيك عذرا

عبد الله حامد كريشان
رسم تعبيري لخاطرة «إلتمس لأخيك عذرا»

أخاطب نفسي وأصدقائي مع علمي بأننا لسنا ملائكة لكن خلينا عالاقل نحاول:

إذا شفته مكشر في وجهك قول يمكن مريض ومتألم، بجوز ممغوص بجوز اسنانه بتوجعه، الله يشفيه… إذا جحرك بعيونه قول احتمال عيونه مسنورات ومركز بدو يعرف مين اللي قدامه، والعتب عالشوف، اذا سلمت عليه وما رد قول مسكين سمعه صاير ثقيل، الكبر عبر الله يعافينا ويعافيه، اذا شافك في الطريق ودار وجه عنك لا تقول صد عني قول الله أعلم شو اللي صار في الجهة الثانية ولفت انتباهه، إذا دخل وخبط الباب وانت مار قول مليون بالميه ما شافني جاري ما بسويها، إذا شافك جاي من مكان بعيد وما عزمك العزومه القوية اللي بدك اياها قول الله يكون في عونه يا دوبه ودوب أولاده والكل هالأيام ماكل هوا والله يفرجها علينا وعليه اكيد ملبي ومفلس ومتضايق وما معه مصاري، اذا رنيت عليه وما رد لا تقول حلقلي أو أعطاني صابونه قول يمكن نايم ولما صحي ما شاف رقمي، كلنا بصير معنا هيك، اذا بعثتله مسج وما رد عليك قول أغلب تلفونات الناس خربانه، هالتلفونات بهدلت الناس وخربت بينهم، اذا مرضت وما أجا يزورك قول عالاكيد ما عرف بعدين كيف بده يعرف مش معقول كل الناس عرفت اني مريض، إذا صار عندك مناسبة وما أجا يشاركك قول الرجل ميه بالميه مسافر لو انه في البلد ما بتأخر عني أبدا، إذا غاب عن موعد بينكم قول لعله خير وعساه خير، ما غاب الا في سبب قوي، اذا طلبت منه مساعده وقصر قول لو بقدر مستحيل يقصر، إذا طلبت منه مصاري قرض وقالك ما معي صدقه من غير ما يحلفلك وقول الله يعين الناس والله يوسع علينا وعليه، اذا صار عنده مناسبة أو وليمة وما عزمك قول اكيد نساني، الله يساعد كل واحد عنده مناسبه اللي عنده مناسبه هالايام بكون معجوق عالاخر…

نحسن الظن بالناس ما استطعنا فحسن الظن رقي في التعامل وراحة للقلب وسلامة للصدر… لكن مع الحيطة والإنتباه والحذر.

قراءة المنشور الأصلي على فيسبوك