دبوس وشبرية

يا صباح يا فتاح يا رزاق يا عليم يا حليم، صباح الخير يا عمك، لازم الواحد يذكر ربه كلما طلع من بيته وكلما رجع، تعال يابن آخي معي بدنا نروح نوخذ بخاطر جيرانا، بشوفك بتلد علي وعالمجلد ومستغرب، لا تخاف يا عمك والله مافي شي، أنا بس متعود ما بطلع من بيتي غير فردي (مسدسي) وشبريتي (الخنجر) على جنبي والدبوس (القنوه) مرات باخذه احتياط، بس يا عمك والله مكافات شر، احنا محنا دوارين شر ولا احنا مشكلجية وعمرنا ما تعدينا على واحد لا قريب ولا بعيد و عمرنا ما جينا في ناس، ولا بلشنا في غيرنا، والشر يا عمك مو مكسب، بس الدنيا ما بتخلا، ما بدنا إذا فيه زعران يطمعوا فينا، الدنيا فيها الخير وفيها الشر، لكن الحمد لله يا عمك كل ربعنا وجماعتنا وجيرانا محترمين، والبلد كلها رايقة الحمد لله والناس بتحترم بعض والشغلة يا عمك مو خوف لا سمح الله لا، لكن تقدير واحترام، وازيدك من الشعر بيت، حتى لو صارت كونه (هوشه) وأكيد بتصير لأن الشيطان موجود وشاطر، بقولك لو صارت كونه والواحد منا فرده على جنبه مستحيل يمد ايده عالفرد أو يسحبه، أكثر ما فيها وإذا لزم الأمر بستعمل الدبوس، حتى الشبرية ما بتنسحب إلا للشديد القوي، يا عمك شايف هالبلد على كبرها وعلى كثرة هالناس لكن الحمد لله البلد كلها ما فيها غير مغفر واحد وضابط واحد، حتى يمكن مو ضابط وكيل، والضابط أو الوكيل طول نهاره قاعد بشرب شاي، ما عنده لا شغله ولا عمله ولما بزهق بنادي جيرانه أصحاب الدكاكين يقعدوا معه، الناس ما بتروح مغافر ولا بلزمهم مغافر، كل واحد يا عمك عارف حدوده، الناس يا عمك بتحكمها أخلاقها ودينها وعاداتها والشيوخ والكبار ماهم مقصرين عندهم الحكمة وبمونوا عالزغير والكبير وكلمتهم مسموعة والسرسري بعيد عنك وعن السامعين بحسب مليون حساب لأهله ولعشيرته وللشيوخ قبل ما يفكر يسوي مشكله أو يتعدى على غيره… الحمد لله ياعمك احنا والله بألف خير وبألف نعمه.