مدونة عبد الله كريشانبحث

لما نويت أغش في الإمتحان

عبد الله حامد كريشان
رسم تعبيري لخاطرة «لما نويت أغش في الإمتحان»

طول عمري الحمد لله ملتزم وشاطر في المدرسة، صح كثير حركة وبشارك في كل نشاط لكن أغلب السنوات كان ترتيبي من الخمسة الأوائل، اما في التوجيهي فكنت الأول على المحافظة، والكلام اللي ما عليه شهود مردود… شهودي شهاداتي وملاحظات المدرسين شوفوها، أما إذا شفتوا اشي مش مزبوط اغرشوا… داووود… ظلت المسيره التعليمية ماشية معي تمام التمام وفي السليم لغاية امتحان من امتحانات سنة التخرج من الجامعة… بكرا (من شهر مايو سنة ٧٦) كان موعد امتحان مادة معقدة وبتعبيرنا الطلابي زنخة… المادة طويلة حوالى الف صفحة، ونظام جامعتنا، جامعة القاهرة، كان للمادة امتحان واحد آخر السنة والامتحان كله سؤال واحد مقالي لكل المادة وأنت وحظك يابو الحظوظ… أنا صارلي من اسبوع عايف حالي والدنيا مسوده في عيوني، مصاري ما معي، حوالتي الشهرية ما وصلت على غير العادة، فلست عالمزبوط والفلاس ضرب اطنابه معي وبصراحة المفلس لا بعرف يدرس ولا بعرف يسخم، حق سيكاره ما معي… الطلاب كلهم زيك زيك ومثلك مثلك يعني قبل آخر الشهر بأسبوع الواحد لو ترميه من فوق برج القاهره ما برن… البيت خاوي والثلاجة بتزغرت ما فيها غير المي ومثلث جبنه نستو… الطلاب القريبين من سكني ما معهم يحلقوا… واحد بس من صحابي طلع مسعد، لقيت معه خمس جنيهات قالي عالتلفون بالحرف تعال خذهم بس اسمع زي الله ما خلقك بدك ترجعهم لما توصل حوالتك… قلت ماشي… لكن بيته بعيد حتى أوصله لازم أركب ثلاث مواصلات… قلت قبل ما اطلع خليني اسوي ابريق شاي يمكن اروق شوي… لكن لانها متطينه من جميع الجهات، لقيت المي مقطوعه، رميت الابريق في المجلى وطلعت باتجاه الخمسه جنيه… غبت تقريبا ست ساعات، لما رجعت لقيت نص سكان الجيزه وشارع الهرم عند باب عمارتي. وسيل مي في الشارع طالع من باب عمارتنا… لما شافوني ارتفعت أصواتهم أهو جه. أهو جه… يعني اني أنا شرفت، لما وصلت عرفت ان المي اللي معبي الشارع طالعه من شقتي لاني لما رميت الابريق في حوض المجلى وللحظ الاقشر غطاة الابريق زي ما يكون حداد شاطر ملصمها تلصيم في بالوعة المجلى، ويظهر ان المي شرفت على طول ومن لما أنا طلعت، ولاني كاين فاتح الحنفيه على الآخر وتاركها مفتوحه… المهم لما فتحت الباب عينك ما تشوف الا النور… السد العالي وانفلت في وجهي… من خمسين لستين سنتيمتر ارتفاع المي في شقتي… واغراضي وكتبي اشي طايش ومطشح على وجه المي واشي بسبح واشي غرقان… حتى فرشات التخوت غرقانه… يا فرحتي بالخمسه جنيه… الجيران ما قصروا ساعدوني وكتبت عنهم من زمان مقال خاص بعنوان عندما يحبك الجيران. لكن الحين شو اسوي في الامتحان… سكرت معي عالاخر… كيف بدي الحق أدرس أو أراجع ألف صفحة، صفنت، قلت ما بدهاش بقى… ما فيش غير البراشيم… جبت يمكن عشرين علبة كبريت… كنت أيامها مدخن شره… الكبريت المصري على أيامنا الجرم من جوا أبيض يعني بنكتب عليه… وبلشت أبرشم على ظهر الجرم لكن وأنا بكتب اشتغل صراع داخلي بيني وبين ضميري… سامعه زي ما يكون بكلمني بصوت عالي وبقول له له يا عبد الله مو عيب عليك ومو حرام… بدك تغش؟ وين القيم؟ وين الأخلاق؟ بدك تخربها في الاخر وتغش؟ وانت طول عمرك صفحتك بيضا… يا عيب العيب عليك؟!… طنشت وسويت حالي منا سامع… الشيطان شاطر… وكملت البراشيم… وحضرتها ونويت عالشر… لكن في الامتحان ربنا من فوق سترها معي حتى تظل الصفحه بيضا… لقيت حالي بجاوب على السؤال من راسي وما احتجت الحمد لله ولا لكبريته…

قراءة المنشور الأصلي على فيسبوك