مدونة عبد الله كريشانبحث

ذكريات عيد

عبد الله حامد كريشان
رسم تعبيري لخاطرة «ذكريات عيد»

بحاول أتذكر مين اللي راح معي يومها لكن هو عالاكيد واحد من اخواني أو محمد ابن عمي أو سليم عمر صاحبي… على باب بيت الطين طُقطيقة ما كان في كهربا لكن صوتها بقرع قرع بوصل لآخر البيت، طلعت الحجة ام حسن الله يرحمها، مرة خال ابوي فتحتلنا، كانت في عمر جدتي الله يرحم الجميع، احنا عيال زغار بين التسع والعشر سنين، كنت استغرب ليش النسوان الكبار ببوسن على ايدنا واحنا مفاعيص زغار، الولد مهما كان عمره زغير هو عندهم رجل… دخلنا الحوش، بيت الطين كبير لكن بضوي ضوي… تنك وقواوير الزريعة والورد على داير الحوش بفتح النفس… قالت يا هلا ورحب في عيالي… تقول اللي جايين عندها ضيوف كبار، ظلت تهللي وترحب فينا وغير ندخل ونتفضل جوا جوا ونقعد عالقاطع… كلكوا بتعرفوا القاطع… زي ما يكون مصطبة في صدر الغرفة وفوقه جنابيات وشراشف، عليم الله القاطع من النظافة بتستحي تلمسه مو تقعد عليه… شرشف أبيض أبيض مطرز بازرق ومخدات بيض طوال مطرزات بتسند ظهرك عليها، وعلى جنابك مراكي… قعدنا عالقاطع، القاطع عالي رجلينا ما وصلن الأرض، قمنا نلد في وجوه بعض مستغربين كل هالاحترام…!!!، الغرفة كبيرة، بيت ابو قنطرة، كل شي حواليك نظيف ومرتب ومعطر، الشبابيك فيها تحف ومناظر، شبابيك بيت الطين عميقة عمقها فوق النص متر، الشمس نازلة من الروزنة وريحة البخور وعود الند بتهف عليك من كل جال، دلة القهوة النحاس تقول الحين طالعة من المصنع، صبتلنا الجده، ريحة القوة والهيل بتفحفح، قالت اتقهوو تراكوا زلام، شربنا واحنا محمرطين، حطت صينية الشاي والكاسات قال ما بصير غير نشرب شاي منعنع… قالت وهي مبتسمه بتفرك في طرف بنطلوني وبتتلمس كم القميص يا مبروك يا جديد، أمانة الله ما نيمتهن عند راسك مبارح؟ .، ان شاء الله عيدكو مبارك يا وليدي، اكيد ابوك جابهن من عمان، ترى بياعات معان ما بجيبن مثل هالبضاعة، والله ابوكوا مهو مقصر الله يطول عمره… اشوف ارفع رجلك، حتى الصندل كايف، يا ذكر الله عليكوا كلكوا وعلى هدومكوا، الحج ابو حسن خال ابوي الله يرحمه اقبل، هيبة، ثوب وعباه ومجلد فرد،، شكله كاين يصلي الضحى، قمنا نسلم عليه، ما خلانا نبوس إيده… صدقوني زلام زمان لما تشوفهم ما بتتخيل غير خالد بن الوليد أو ابو دُجانه أو القعقاع بن عمرو… قلنا عيدكوا مبارك بدنا نطلع نعيد… قالت اقعدوا تغدوا معنا لو سبقتوا قبل شوي كان أكلتوا معنا مجللة وكان شفتوا العيال، عيال عيالي راحوا يعيدو على عماتهم… لما ما رضينا نقعد قالت طيب استنوا… فتحت الصندوق المصدّف وكمشت قالت تعال وين مكتومتك وعبت جيبتي ملبس وتوفي وقضامه فيصلية وأعطت كل واحد فينا قرشين قالت يله روحوا عيدوا وتمرجحوا واشتروا من الدكان.

قراءة المنشور الأصلي على فيسبوك