مسج من البيت

كل ما جتني مسج من البيت الظهر وأنا برا بعرف لحالي ومن غير ما افتحها، بميل على طول عالسوبر ماركت بجيب علبة لبن وبميل عالمخبز بجيب ربطة خبز… اليوم وأنا في المخبز واقف في الطابور مشان أحاسب صفنت… ما شاء الله لا قوة إلا بالله مخابز اليوم غير شكل، عند باب المخبز بتوقف ربع ساعة وبتظل تستنى لما واحد يطلع وتوقف سيارتك محله إذا معك سيارة، وبعض المخابز بدها رقيب سير ينظم حركة المرور والباركينج قدامها… من جوا المخبز تبارك الله مثل المول عشرين نوع من الخبز وعشرين نوع من الكعك… كيك وموالح ومعجنات وحلويات ما بتعرف على شو تتفرج… الحمد لله نعايم الله ربنا يزيد ويبارك… رجعت خمسين ستين سنة لورا… الله يرحم زمان وأيام زمان وافران زمان… معظم قصص الجن اللي سمعتها من امي الله يعافيها كانت أحداثها تدور وهي بتخبز في الطابون في العتمه في الخرابة، قال حتى يتسحروا خبز ساخن… كل بيت كان فيه طابون، ما كان في أفران بتبيع خبز كماج للناس، هذا حصل بعدين.
وانا في الصف الثالث ابتدائي كنت أحب اقعد جنب الوالدة وهي بتخبز عالصاج بناولها حطب وباخذ منها الشراك وبصفطه في المخمر، ومع ان دموعي بسيلن وبهرن هر من الدخنة بس مبسوط، الخبز زاكي وريحته ازكي، اكلتلي يمكن شراكيتين قبل ما تخلص، أكثر شي كان ينكد علي يوم الاجازه لما امي تناديني وانا في نص لعبة القلول مع العيال في الشارع، تعال يله زي الطير ودي الخبزه (العجنة) عالفرن الحين بتلاقي الفرن مليان…
اذا الذاكرة مزبوطة كان في معان اول الستينات فرنين بخبزوا للناس فرن العم محمد علي مرعي في المنزلة وفرن العم عيسى درويش الله يرحمهم… العم محمد علي فنان في شغله مثل العم عيسى بس محمد علي منظم أكثر لكن شديد وعصبي كنا نقعد في فرنه مؤدبين أكثر من لما نكون في الحصة عند الاستاذ… لان اللي بتكلم عنده ما برضى يخبزله يا إما برجّع دوره للآخر وبروح عليك كل اللعب يومها.
انكد شي في ذكريات المخابز والافران زمان اذا امك قبل العيد أو قبل ما يسافروا الحجاج سوت كعك معان… يا حبيبي… بدك تنتع على راسك اثنعشر سدر رايح جاي عالفرن…
شاب واقف وراي حط إيده على كتفي قال عمي عمي مالك سرحان اجا دورك حاسب