مدونة عبد الله كريشانبحث

حوار مع الأسعار

عبد الله حامد كريشان
رسم تعبيري لخاطرة «حوار مع الأسعار»

— سلام

— وعليكم السلام

— لويش حاط إيدك على خدك… إن شاء الله ما في شي!!

— لا… سلامتك ما في شي… كل شي تمام التمام… والأسعار تمام… والرواتب تمام والأولاد مبسوطين والعيشة رغيده… يعني توب التوب… يعني أحوالنا أحسن من هيك عبث… ذهب عصملي…

— اااه… فهمت… طيب بدي أسألك: أمانة الله عليك لو الحكومة تزيد راتبك خمسين دينار بتزبط الأمور معك؟ وبتنبسط من للحكومة وبتدعيلها؟

— أدعي للحكومة؟!!! ضحكتني يا شيخ… اسمع أول شي ومشان الله خلي الحكومة على جنب ولا تجيب سيرتها ولا اسمها قدامي لأني كل ما بسمع كلمة حكومة بصيبني خاشق باشق وباجي انفجر واذا انفجرت أنت أول واحد بتروح فيها دملكي…

— خلص خلص لا خاشق ولا باشق ولا بجبيب اسمها ولا بجيب سيرتها… وبنخليها ع جال… بس جاوب على السؤال

— اسمع… عليم الله مش إذا يزيدوا راتبي خمسين دينار، عليم الله لو يضاعفوا راتبي كله على بعضه الأساسي مع العلاوات لو يضاعفوه مرتين يا ثلاثة يعني يضربوه في اثنين أو في ثلاثة ما زبطت معي ولا غطى مصاريفي ومصاريف الاولاد… ولا لحقنا جنون هالأسعار… ولا عشنا زي الناس. انت يا رجل مش عايش معنا ولا شو؟ الأسعار يا حبيبي مش بس نار الأسعار جهنم وسعار… والرواتب زي ما هي محلك سر…

— يا لطيف… الله يفرجها من عنده بس… طيب فكرك بتسويها الحكومة هالمره وبتحلها وبتوقف مع المواطن المطحون؟

— بشوفك قمت تلاخم، يمكن ارتفعت حرارتك مثل ما ارتفعت الأسعار…، اسم الله عليك والرحمن… بعدين احنا شو قلنا؟!! . يا صاحبي احنا المعانية قلناها من زمان وبعدنا بنقولها

(مي قريّبي ولا القرب حواليها)

قراءة المنشور الأصلي على فيسبوك