عَفَتْ

اليوم معطلين، ما بدي استنى الفطور، بدي امصع قبل ما ابوي أو امي يحسو، اذا شافوني يا إما بقولوا روح جيب حمص وفول للفطور يا إما روح جيب لحمه واغراض للغدا… الحين يمكن صارت الساعه تسعه، نص عيال الشارع بلعبوا برا، ما بدي اليوم العب قلول ولا كره ولا سبع حجار ولا سيارات اسلاك، اتفقت أنا وصاحبي اليوم نغز فخاخ، بدنا نصيد عصافير، مبارح اشتريت فخ، لقيت نوعين، فخ عادي وفخ ابو ضروس، فخ ابو ضروس للطيور الكبيره، ما رضيت اشتريه، حرام ابو ضروس قوي بكسر عظام العصفور، صاحبي قال بستناك الصبح عند بيارة ابو عمر، انت جيب الفخ وانا بجيب الطعم، الطعم نوعين، يا اما شحيميات يا اما جلمود، الشحيميات أغلى خصوصا اذا جديدة، الشحيمية بتجيب العصفور من آخر الدنيا، أما الجلمود عادي يمكن بتعريفه تشتري كم واحد… أو تحفر تحت أي شجرة بتلاقي منه.
في بيارة ابو عمر ابراهيم خطاب (الله يرحمه) ما كنا نقدر نغز فيها فخاخ لانه دايما موجود في البيارة بشتغل وبزرع واذا شافنا لازم نشرد ولا بنتبدهل، بس في بيارة ابو احمد الحج عبدربه (الله يرحمه) بنقدر لانه قليل لما يجي عالبياره… لقيت صاحبي بستنى عالموعد ماسك علبه، طبعا علبة الطعم، صاحبي اشطر مني في الفخاخ، لكن أنا بعدين صرت اشطر منه في بارودة الخردق أو الدمدم، لاني اعتزلت الفخاخ من لما صرت في الصف الخامس، يا جماعه ما بعرف ليش الكبار ما كانوا يحبوا إنا نصيد بالفخاخ، ويزعلوا ويبهدلوا ويمكن يضربوك اذا عرفوا انك بتغز فخاخ، وغز الفخاخ كان معياره، كانوا يعيروا اللي بغز فخاخ يقولوا (اخص يابو الفخاخ)، ويا ويل اللي الاستاذ بدري عنه أو بشوفه بغز فخاخ، بسخطه سخط ويمكن يحطله صفر… غير الخيزرانا اللي رح تلعب على اديه وعلى رجليه لعب… مشان هيك أنا اعتزلت الفخاخ واشتريت باروده دمدم وصرت اصيد فيها، وصرت فيها معلم… بنرجع للسالفه… اذا اجا صاحب البيارة عالاكيد راح عليك الفخ… بتصادر… وبتلاقي الشكوى قدامك في البيت وانت ونصيبك…
الله يرحم كل أصحاب البيارات ويسامحنا على قد ما جنناهم…
أخذ صاحبي مني الفخ حتى يزبط الامور وركضنا قبل ما يشوفنا صاحب البياره، تخبينا تحت الزيتونه، غزينا الفخ بعيد شوي عن الزيتونه، غطيناه في التراب، الدوده بتلعب لعب، ورجعنا تحت الزيتونه نراقب من بعيد ونستتى…
كنا نعرف من العصافير اشكال والوان، فرخ معان وابا العلا والوراده الكحلا والحميرة… والقرقز وقشاع ذيله… أصعب شي في الصيد فرخ معان والقرقز، أما باقي العصافير نفسها ردية بس تشوف الشحيمية أو الجلمود أو الدوده بتهجم وبتغوص عليها غوص وبتروح فيها…
قال صاحبي اسمع، شايف هذاك العصفور، قشاع ذيله، اللي على سلك الكهربا، هاظا بدو مدارجه… يعني بدي ادارجه مدارجه للفخ… صاحبي بلش يزحف زحف ويصفر تصفير خفيف لما العصفور صار يقرب عالفخ واول ما العصفور شاف الدوده هجم عليها وطلعت الغبرا من عند الفخ… صاحبي ركض ركاض وهو بناديني بقول بصوت عالي عفت… عفت… وركضت أنا أشوف.