مدونة عبد الله كريشانبحث

جدتي و بنتي

عبد الله حامد كريشان
رسم تعبيري لخاطرة «جدتي و بنتي»

أيام جدتي ما كان في كهربا كانت من بعد المغرب تضوي الفنار وتعلقه عالقنطره وإذا أجا ضيوف بتعطي جدي الضو نمره أربعة يضويلهم الديوان ويتعللوا عليه، جدتي عالبساطة بعد صلاة العشا بتنام وكل البيت كان بعد صلاة العشا بنام، جدتي بيتها كان من طين وارضيته تراب بتكنسو في ايدها بمكنسة قيصوم وبعد ما تكنس بترشه بالمي، ريحة القيصوم المعطرة مع رشة المي بتعبي البيت، جدتي أمية ما بتقرا ولا بتكتب لكن بتفهم كل شي، مش حافظة إلا الفاتحة والصمدية والمعوذات بتقراهن في الصلاه لكن بتحس عندها ايمان بوزن جبال، نشيطة وشاطرة في كل شي، طول نهارها بتشتغل في البيت ما بتقعد بالمره، وطول ما هي بتشتغل بتسبح وبتدعي للصغار وللكبار، يا محسن دعاويها بتحسها طالعة من جوا جوا قلبها، بتعجن على ايدها وبتخبز عالصاج والطابون وبتغسل على ايدها وبتخيط وبتكوي في مكواة الفحم، جدتي حتى إذا قعدت ترتاح مغزلها ما بفارقها، الخدرة اللي في الديوان هي سوتها والبساط اللي في بيت القناطر من شغلها، بتطعمي الغنم والجاج وبتحلب بايدها وبتسوي جبنه ولبن وسمنه وبتسوي معقود وتطلي ونمليتها مليانه اشي زيتون واشي مقدوس واشي مربى وبندوره مقطنه وقطين وزبيب ونعايم الله، اذا اجا جدي بتلاقيه عند باب الحوش البراني وبتهللي وبترحب فيه حتى احنا الزغار كانت تحترمنا كثير وتبوس ايدنا وتبوس راسنا… جدتي حياتها كانت قاسية، جدتي تعبت كثير… جدتي انسانة عظيمة. الله يرحمك يا جدتي.

أيام بنتي أيام تطور واجهزة وتكنولوجيا… بنتي خلصت التوجيهي جابت الحمد لله معدل كويس حطيتها في الجامعة، تفوقت وتخرجت وربنا يسر امورها وتوظفت، مكان الشغل بعيد والمواصلات غالية، تعلمت السواقة وأخذت رخصة وبعد شوي اشترت سيارة بالاقساط، اجاها نصيبها وتزوجت، بنتي ربنا رزقها اولاد وبنات، صار عندها عيله وعيال ومصاريف ومسؤوليات كبار، بنتي صح عندها ثلاجة وغسالة وأجهزة لكن كمان بتصحى من قبل الفجر وبتصحي البيت، بتصلي وبتلبس أولادها من قبل ما تطلع الشمس وبتحضر اكلهم وكتبهم وشنتاتهم، الرضيع بتوديه عالحضانة وقلبها بظل مشغول عنده لانه كثير بمرض، اولاد الحضانه بنقلوا الأمراض لبعض، ومهما كان الحضانه مش زي الام، ونقل الرضيع للحضانه في البرد والموت مثل الموت… الاولاد والبنات اللي في المدارس بتستنى بنتي معهم في الشارع لما تجي باصات مدارسهم وتوخذهم، وعالسريع بتروح لشغلها الشغل كمان ما برحم، بنتي بتحب تادي واجبات عملها بضمير وتكون متميزه في شغلها مشان هيك ما بتخلي من جهدها جهد وبتفكر في شغلها ليل نهار وبتحاول تطور فيه وتطور حالها ولو يصحلها بتكمل دراسات…، دوامها طويل، لما بتروح بتكون طبعا هلكانه لكن شغل اليوم بعده ما انتهى… الواجبات أكثر من الأوقات، بتفتح شنتات بناتها وأولادها حتى تشوف شو عليهم دراسة وواجبات، لكن الكل الحين ميت من الجوع، بتطلع من الثلاجة الطنجرة اللي طبختها مبارح في الليل وبتسخن الأكل بتوكل هي وزوجها والأولاد لكن اكلهم كمان شلفقه حتى الاكل ما بتهنوا فيه، لسا البيت محتاج تنظيف وترتيب والمطبخ مكوم فيه الجلي ومناهج الاولاد طويلة وتدريس الاولاد محتاج ساعات… بنتي بتتمنى لو ساعات اليوم بدل ما تكون اربع وعشرين تكون خمسين أو ستين حتى تقدر تخلص كل اللي عليها وحتى تقدر تهتم أكثر في زوجها وفي بيتها وفي حالها وفي أولادها… وبلكي يظل عندها شوية وقت ترتاح فيه… بنتي حياتها قاسية بنتي بتتعب كثير… بنتي إنسانة عظيمة… الله يعطيك العافية ويعينك يا بنتي.

قراءة المنشور الأصلي على فيسبوك