مدونة عبد الله كريشانبحث

منقول

عبد الله حامد كريشان
رسم تعبيري لخاطرة «منقول»

كلمات رقيقة وطيبة اهداء لكم ولجميع الاحبة

قال الشاعر

لما…

جالي ابويا في المنام…

اتفرد جنبي ونام

قالي فينك يابن ضهري

لا زيارة منك ولا السلام؟

قلتله في الدنيا يابا

قالي دنيتكم خسارة

قلت له مطحون في الرحايا

باجري جري الوحش فيها

من صباحي ولمسايا

قاللي يابني عيش حياتك…

إرضي ربك وارضي ذاتك

قاللي . اسألني أنا

مش حينفعك الا عملك

اعمل الصالح تملي

زكي يابني وصوم وصلي

خلي حسناتك بيها تعلا

خلي ذكر الله تملي فوق لسانك

إدعي يابني في كل لحظة

مش عشاني . .لأ . عشانك

ده الدعا هيعلي شانك

واوعي تلمس ايدك م حرام

ولا يدخل جيبك مال حرام

بالحرام يابني بتضيق القبور

قلتله ويش حاله قبرك؟

قاللي يابني كله نور

قد إيه ربك رحيم

قد إيه ربك غفور

كنت رايح له وشايل

فوق كتافي ألف ذنب

بس كان جوايا قلب

ما يعرف غير يحب

رحمة ربنا اوسع من خيالك…

ابتسمت في ضي وشه

وقولتله دي مكتوبالك

زدني يابا في النصيحة

قاللي حاقولها لك صريحة

اوعي يابني في مرة تظلم

أو تكون أداة لظالم

وانصف المظلوم تملي

وخلي قلبك بيت مظالم

وادعي يابني دوم لأمك

زيها ماشالش همك

كان رضاها السعد يابني

ومهما تعلي ولا تبني

خلي بالك من ولادك

هما دول مالك و زادك

هما دولة امتدادك

قلتله نفسي اجيلك

قالي كل شئ يابني بأوان

كل واحد له أوانه

بالمكان وبالزمان

قمت بايسه فوق جبينه

ولمست بشوق عيونه

وصحيت م النوم بفرحة

شوفت ابويا في المنام

من حلاوة الحلم نفسي

كل ما اقوم تاني . أنام…

(منقول)

اللهم ارحم من مات من آبائنا وامهاتنا…

وللأسف لم أتمكن من معرفة الشاعر

قراءة المنشور الأصلي على فيسبوك