بدون بنج

- مالك يا رجل وجهك اصفر اصفر؟!! خلي قلبك قوي… عمليتك بسيطة… كلها عشر دقايق وبتطلع… ليش خايف كل هالخوف؟!
- أنا مش خايف من العملية… أنا خايف من البنج…
- البنج؟ ليش البنج بخوف؟ أنا صارلي ممرض في غرفة العمليات عشرين سنة اول مرة بسمع هالكلام…
- يا سلام! البنج يا سيدي وراه مصايب الدنيا كلها… وراه بلاوي… البنج جاب هستيريا لجاري… انت شو بعرفك؟
- أفف… ليش؟!!
- لأن جاري لما طلع من العملية كابن بخربط وبيردد اسم وحدة ما بتعرفها زوجته وينادي عليها… ومن يومها واقفة امورهم ع الطلاق… والزلمة مسكين بحلف ايمان مغلظة انه ما بعرف وحدة بهالاسم… لكن… ع مين؟!
- معقول هالحكي؟!
- مثل ما بقولك…
- وانت ليش خايف؟!
- أنا؟ لا ابدا… أنا ما عندي اشي مخبا… بس حاس ان هذا البنج (ملعون والدين) يمكن فيه مركبات بتخلي الواحد يكذب…
- شووو؟
- أقولك أنا ما بدي اتبنج… خلي الدكتور يعملها بدون بنج… عادي بتحمل…
- شو انجنيت انت؟ وبعدين البنج بخلي الواحد يكذب؟ صدقتك… يلله يلله… خلص وصل الدكتور… يلااا
- اسمع… اعمل معروف… الله يوفقك… بعد العملية لا تطلعني لغرفتي… ترى المره والاولاد كل واحد محضر تلفونه وبدهم يسجلوا كل الاحداث والوقائع… استرها معنا يا رب…